ராகம் தானம் பல்லவி – பாகம் 4

Standard

ராகம், தானம், பல்லவி வரலாறு சாஹித்யம் செய்முறை என்று இதுவரை ஓரளவு எழுதியுள்ளோம். இங்கு ஒரு சற்று கடினமான பல்லவி அறிமுகப்படுத்துவோம். பல்லவியை இந்த, அடுத்த பாகங்களில் முழுவதும் பிரித்து விளக்குகையில் மேலும் பல விஷயங்களை பகிர்ந்துகொள்ளமுடியும்.

ஏன் இப்படி தடாலடியாக கடினமான பல்லவி என்றால், நமக்கு (எனக்கு) நீச்சல் கத்துகரதுன்னா தொபுகடீர் என்று குதித்து அப்படி இப்படி கையை காலை உதறி, வாய் மூக்கு நிறைய தண்ணீர் குடித்து, புகுந்து புறப்பட்டு, மூச்சு முட்டி, உயிரே போச்சா என்கிற ரீதியில்தான் கற்றுக்கொள்ளமுடியும். இடுப்பில் ரப்பர் ஃப்ளோட் அணிந்துகொண்டு Baby poolலில் பாதம் மட்டும் இரண்டு வாரம் நனைவதில் தொடங்கி. சாரி, எனக்கு அம்முறையில் அப்பியாசமும், நம்பிக்கையும், பொறுமையும், இல்லை. மேலும், எனக்கு என் வாசகர்கள் புத்திசாலிகள் என்றும், கோடிகாட்டினால் சூட்டிகையாக புரிந்துகொள்வார்கள் என்றும் ஸ்திரமான நம்பிக்கை.

இனி நேரடியாக பல்லவி பாடம்.

எச்சரிக்கையாக ஒன்று. நான் பாடம் நடத்துகையில் ஜோக் அடிக்கமாட்டேன். ஆளைத்தான். ரொம்ப கறார். இப்பவே சொல்லிவிட்டேன். பக்கத்தில் 15 செ.மீ. ஸ்கேல் கூட வைத்திருக்கிறேன். முடிந்தால் படிக்கும்வரை கையை கட்டிக்கொள்ளுங்கள். சிரிப்பு வந்தால், கட்டுரைக்கு வெளியே போய் சிரித்துவிட்டு, கனமான இலக்கியம் ஏதையாவது தொட்டு கண்ணில் ஒத்திக்கொண்டுவிட்டு (படிக்க வேண்டும் என்று கட்டாயமில்லை), மீண்டும் உள்ளே வரலாமா என்று கேட்டுக்கொண்டு, அனுமதி கிடைத்ததும் படியுங்கள்.

இப்போது முதல் பாகத்தில் தொட்டிருந்த பிரபலமான ஒரு சதுர் ராகமாலிகை பல்லவியை எழுதிக்கொள்வோம்.

சதுர்த்தி, சதுர்தண்டிப்ரகாசிகா, சதுரகராதி, சதுஸ்ரம், என்ற வரிசையில் சதுர் என்றால் நான்கு; நான்கு ராகங்களில் அமைந்த பல்லவி. சிறப்பு, ராகங்களின் பெயர்களையே சாஹித்தியமாக, பாட்டின் வார்த்தைகளாக பொருள்பட அமைந்துள்ள பல்லவி.

சங்கராபரணனை அழைத்தோடி வாடி கல்யாணி தர்பாருக்கு

எந்த நான்கு ராகங்களில் இதைப்பாடவேண்டும் என்று உங்களுக்கு புரிந்திருக்கும். கேட்டுக்கொண்டே கீழே எழுதியுள்ளதை படியுங்கள்.

இந்த ராட்டை பல்லவி சதுஸ்ர ஜாதி திரிபுடை (ஆதி) தாளத்தில், சதுஸ்ர நடையில், இரண்டு ஆவர்த்தத்தில், இரண்டு களை சௌக்கத்தில், அமைக்கப்பட்டு, சமத்தில் இருந்து முக்கால் இடம் தள்ளி அனாகத எடுப்பில் தொடங்குகிறது.

இப்பல்லவி மொத்தமாக ஒரு பூர்வாங்கம், ஒரு உத்திராங்கம் நடுவில் பிரிப்பது போல் வருவது ஒரு அருதி என்று கட்டமைப்பு (போன பாகத்தில் சொன்னது) இல்லை. சற்று கடினமாக, இரண்டு ஆவர்த்தங்களிலும் அறுதி கார்வை இரண்டரை அக்‌ஷரம் வருகிறது. சங்கராபரணனை சொல்லுக்கும் அழைத்தோடி சொல்லுக்கும் இடையே இரண்டரை அக்ஷரம், கல்யாணி மற்றும் தர்பாருக்கு சொற்களிடையே இரண்டரை அக்‌ஷரம். இரண்டு, மூன்றாவது ராகங்களை அழைத்தோடி வாடி கல்யாணி என்ற ஒரே சொற்றொடரில் ஒட்டியும், நான்காவது, முதலாவது ராகங்களை தர்பாருக்கு சங்கராபரணனை என்ற சொற்றொடரில் ஒட்டியும் அமைத்திருக்கிறார்கள். அதுவும் சமத்தில் இருந்து தள்ளி தொடங்கியபடி. அப்படியே தாளம் போடப் போட பாடப் பாட, நிறுத்தவே முடியாது.

பல்லவி ஒரே வரிதான். ஆனால் சங்கீத அங்கங்களை உன்னிப்பாக நோக்கினால், சிம்ப்ளி அமேசிங் கம்போஸிஷன்.

இருங்கள், அடிக்க வராதீர்கள். மேல்வாக்கியங்களில் எப்படி பல்லவியை ரசிக்க வேண்டும் என்பதற்காகத்தான் சங்கேத வார்த்தைகளுடன் குறிப்பிட்டேன். அதில் உள்ள அனைத்து சில்ஃபான்ஸ் கில்ஃபான்ஸ் மேட்டர்களையும் சிலுக்குசிக்கான்சிக்கான்னு ஓரளவு கட்டுரையின் இப்பாகத்தில் புட்டுவைப்போம். படித்து முடிக்கையில், தொடங்கியதிலிருந்து விலகி வேறு எங்கோ போய்விட்டது போல் இருக்கலாம். பொறுமையுடன் இருங்கள். நிச்சயம் அடுத்த பாகத்தில் மீண்டும் இதே பல்லவிக்கு வந்து, இங்கு விளக்கியதையெல்லாம் புரிந்துகொண்டும், ரசிப்போம்.

*****

முதலில் ஆவர்த்தம்; என்றால், சுற்று. ரவுண்ட். ஒரு ஆவர்த்தம் என்றால் ஒரு சுற்று. ஆவர்த்தம் இசைக்கு, பாடலுக்கு, மிக உபயோகமான கால அவகாசம். தாளத்தின் அங்கங்கள், கால இடவெளிக்கேற்றவாறு ஆவர்த்தத்தின் அவகாசம் கூடவோ குறைந்தோ மாறுபடும். பாட்டின் அவகாசத்தை நீட்டவோ குறைக்கவோ, பாட்டின் கட்டுக்கோப்பை, வரிகளில் வார்த்தைகளை நிர்ணயிக்கவோ, ஆவர்த்தங்கள் இன்றியமையாதவை.

சில உபயோகங்கள் பார்ப்போம்.

மிருதங்கம் தனி ஆவர்த்தம் 16 ஆவர்த்தங்கள் வாசிக்கிறார் என்றால், ஏதோ ஒரு தாளத்தை (பக்கத்தில் பாடகர்) 16 முறை முழுவதுமாக போட்டுமுடிக்கும் கால அளவுவரை மிருதங்கத்தில் வாசிக்கிறார் என்று பொருள். ஒரு தீர்மாணம் 2 ஆவர்த்தங்களில் வாசிக்கிறார் என்றால், ஒரு தாளத்தை இரண்டு முறை போட்டுமுடிக்கும் காலம் வரை தொம்தரிகிட, திம்தரிகிட, தத்தும்தரிகிட என்ற ரீதியில் ஒரு பெரிய லய சொல்கட்டை (மிருதங்கத்தில் தட்டி) வாசிக்கிறார் என்று பொருள். அதையே வாயால் சொன்னால் கொன்னக்கோல்.

அதேபோல பாடகர் கீர்த்தனையின் முடிவிலோ இடையில் ஏதோ ஒரு இடத்திலிருந்தோ ராகத்தின் ஸ்வரங்களை சொல்லி ஸ்வரக்கோர்வைகளை பல ஆவர்த்தங்கள் பாடுவார். வயலின் வித்துவான் மீண்டும் இதை வாசிப்பார். பாடகர் 2 ஆவர்த்தம் பாடினால், வயலினும் 2 ஆவர்த்தங்கள் அப்படியே ரிப்பீட்டு.

சரி இது போதும். கீழே வீடியோவில் இதற்கு உதாரணம் கொடுத்துள்ளேன். மீண்டும் பல்லவிக்கு வருவோம்.

எந்த ஒரு தாளத்தையும் முழுமையாக ஒரு சுற்று போட்டு முடித்தால் அத்தாளத்தில் ஒரு ஆவர்த்தம் என்று பொருள். ஒரு கீர்த்தனை, பாடல் வரிகளை, ஒருமுறை முழுவதும் பாடி முடிக்க பல ஆவர்த்தங்கள் ஆகும் இல்லையா. பல்லவிகள் பொதுவாக ஒரு தாளத்தில் ஒரு ஆவர்தத்தினுள் அமைக்கப்பட்டிருக்கும். விதிவிலக்காக நம் பல்லவி இரண்டு ஆவர்த்தங்களில்.

[அதான் சொன்னேனே, உதாரணத்தையே கடினமானதாக எடுத்துக்கொண்டால் பலதைச் சொல்லலாம் என்று.]

அடுத்து ஆதி தாளம்.

ஆதி தாளம் உங்களில் பலருக்கு தொடையில் கைவத்து போடத்தெரிந்திருக்கும். தெரியாவிடின், இப்படி செய்யவேண்டும்.

முதலில் கூன் போடாமல், நிமிர்ந்து சம்மனம் போட்டு (சப்ளாமூட்டி) உட்காருங்கள். முகத்தை சீரியஸாய் வைத்துக்கொள்ளுங்கள். முதலில் உள்ளங்கையால் தொடையில் செல்லமாக ஒரு தட்டு (நம் தொடையில் கொசு உட்கார்ந்திருந்தாலோ, தொடை அடுத்தவரதென்றாலோ படார் என்று அடித்துக்கொள்ளலாம்). பிறகு சுண்டுவிரலில் தொடங்கி மூன்று விரல்களை கட்டைவிரலால் தொட்டு எண்ணிக்கொள்ளுங்கள்.

தொடையில் தட்டு + 3 விரல் எண்ணிக்கை = 4.

அடுத்து மீண்டும் தொடையில் உள்ளங்கையால் தட்டு. அடுத்து திருப்பிப்போட்டு புறங்கையால் தொடையில் தட்டு.  இது ஒரு 1 + 1 = 2 எண்ணிக்கை.

மீண்டும் இக்கை-தொடை தட்டுக்களை செய்தால், மீண்டும் ஒரு 1 + 1 = 2 எண்ணிக்கை.

இப்போது மொத்தமாக 4+2+2=8 எண்ணிக்கை பூர்த்தியாக, ஆதி தாளத்தை ஒரு ஆவர்த்தம் போட்டுமுடித்துள்ளோம்.

மொத்தம் 8 அக்‌ஷரம் உள்ள இத்தாளத்தை ஒரு வேகத்தில் செய்தால் (இரண்டு அக்‌ஷரத்தின் இடையில் சம கால இடைவெளி), ஒரு “களை”யில் தாளம் போடுகிறோம் என்று பொருள். இரண்டு அக்‌ஷரத்தின் நடுவில் உள்ள கால அளவை வேறுபடுத்தினால் களை மாறும். பாட்டின் ‘களை’யும் (விறு விறு, இழுவை) மாறும்.

பாட்டு முடிகிறவரை தொடர்ந்து இப்படி தொடை-கை கால அளவு கணக்கை செய்து கொண்டே போகவேண்டும். ஸ்வர-ராகத்தின் (பாட்டின்) கூடவே லயம் வருகிறது என்று பொருள்.

இதோ நம்ம கைவண்ணத்தில் ஆதிதாள வீடியோ.

[http://www.youtube.com/watch?v=SkkshFo7aHc ]

[வீடியோவே இருக்கிறது, எதற்கு எழுதவேண்டும் என்றால் வீடியோ பார்க்கமுடியாதவற்காகவும் (பிரிண்ட் போட்டு படிப்பவர்களுக்காகவும்) எழுத்திலும் விளக்கியுள்ளேன். அதேபோல் நான் வீடியோ வல்லுனரில்லை. சும்மா இந்த கட்டுரைக்காக ஆர்வக்கோளராய் ஒத்தகையில் கேமிராவை பிடித்தபடி ஷேக் வெல் வைல் இன் யூஸ் என்று எடுத்துள்ளேன். இதெற்கெல்லாம் டொஸ்க்சொல்லி விமர்சனம் இடது கையால் எழுதிப்பழகுங்கள்.]

இனி ஆதிதாளத்தையே சற்று டெக்னிகலாக விளக்குவோம்.

*****

ஆதி தாளத்தை சதுஸ்ர ஜாதி திரிபுடை தாளம் என்பர். சதுர் போல சதுஸ்ரம் என்றாலும் நான்கு. ஜாதி என்றால் வகை. திஸ்ரம், சதுஸ்ரம், கண்டம், மிஸ்ரம், சங்கீர்ணம் என்ற ஜாதி வகையில் சதுஸ்ரம். திரிபுடை (த்ரிபுடம்) தாளத்தின் பெயர்.

தாளத்தை பற்றி சுருக்கமாக: ஏகம், ரூபகம், த்ரிபுட, ஜம்ப, மட்ய, அட, துருவ என்று ஏழு வகை தாளங்கள் இருக்கின்றன. இவற்றில், மேலே சொன்ன ஐந்து ஜாதிகளிலும் அமைக்கலாம். 5 x 7 = 35 ஆயிற்றா. இசை கற்றுக்கொள்கையில் அதனால்தான் அலங்காரங்கள் என்ற விஷயத்தை அப்பியாசம் செய்யச்சொல்லுவார்கள். அலங்காரம் 35 இருக்கிறது. ஒவ்வொன்றும் மேலே குறிப்பிட்ட ஒவ்வொறு தாள வகையில். அனைத்தும் சதுஸ்ர நடையில்.

நடையா, அதுவேறா? இந்த 35 தாளங்களிலும், பஞ்ச (5) நடைகளை அமைக்கலாம். பஞ்ச நடைகளின் பெயர்களும் திஸ்ரம், சதுஸ்ரம், கண்டம், மிஸ்ரம், சங்கீர்ணம் என்பதுவே. (கீழே நடைகளை உதாரணத்துடன் வீடியோவில் விளக்கியுள்ளேன்.) இதனால் 35 x 5 = 175 வகை தாளங்கள் செய்யமுடியும் என்றும் கூறலாம்.

அதேபோல், தனியே ஆதிதாளம் அடுத்து, சாப்பு தாளங்களான கண்டசாப்பு, மிஸ்ரசாப்பு, சங்கீர்னசாப்பு என்றும் இருக்கிறது.

அதேபோல், முன்னர் குறிப்பிட்டபடி, நம் தாளங்கள் அனைத்திலும் லகு துருதம் இரண்டும் அங்கங்களாக அநேகமாக இருக்கும். பல தாளங்களில் அனுத்ருதம், ப்ளிதம், காக்கபாதம், குரு போன்ற பல அங்கங்களும் வரும். பல வித்தியாசங்கள், எளிமையான சட்டத்திற்கு கட்டுப்படாதவைகள் இருக்கிறது. உதாரணமாய், குரு என்பது கல்லுரலில் மாவாட்டுவது போல அப்படி கையை சுத்தி போடுவது.

[மழுப்பலாய் நான் இங்கு எழுதுவது அறிமுகமாக கோடிகாட்ட மட்டும்தான். விஷயம் மிக்கவர்கள் (விஷ-மி-கள்) பொருத்தருள்க.]

எப்படியும் நம் தாள வகைகள் நூற்றுக்கணக்கில் வரும்.

எதில் வேண்டுமானாலும் பல்லவி (கீர்த்தனை, பாடல்) அமைக்கலாம்.

ஆனாலும் பல ராகங்களை இலட்சணமாய் கையாளும் நம் திரையிசையமைப்பாளர்கள், தாள வகைகளை அவ்வப்போதே தொடுகிறார்கள்.  முக்காலவாசி ஆதி தாளம்தான். நடைகள் மட்டும் மாறும். கச்சேரிகளில் தாளத்தில் சூரர்கள் இருக்கிறார்கள். பாட்டை கேட்கையில் சுலபமாக தோன்றும். கையில் தாளம் போடுவதை கவனித்தால், தலை சுற்றும்.

தாளங்களை அப்பால தனிக்கட்டுரையாக பார்ப்போம். இப்போதைக்கு இதையெல்லாம் விடுத்து ஆதியை மட்டும் மேலும் அலசுவோம். நம்ம பல்லவிக்கும் அது போதும்.

ஆதி தாளத்தை விளக்க லகு த்ருதம் இரண்டு அங்கங்கள் மட்டும் போதும்.

தாளத்தின் அங்கமான த்ருதம் லகுவை, துண்டங்களாக உடைக்கமுடியும். செய்தால் அக்‌ஷரங்களாக விழும்.

அக்‌ஷரம் தாளத்தின் உப-கால இடைவெளிக் குறியீடு. இக்குறியீட்டை எட்டு முறை சமகால இடைவெளிவிட்டு வாயால் சொன்னாலோ, தொடையில் கையால் தட்டினாலோ, தலையில் குட்டினாலோ, ஒரு ஆவர்த்தம் (சுற்று) ஆதிதாளம் போடுகிறோம் என்று பொருள்.

அக்‌ஷரங்களையும் உடைக்கலாம். மாத்திரைகளாக. மாத்திரை என்றால் உச்சரிப்பின் ஒரு கால அளவு.

அடடா எங்கெங்கோ சுற்றி தமிழிலக்கணத்திற்கு வந்துவிட்டீரே என்றால், அதான் சொன்னேனே, கர்நாடக சங்கீதம் தமிழர்களின் பொக்கிஷம்.

சரீர, சாரீர ஆரோக்யம் கருதி மாத்திரையையும் பொடித்து சூர்ணமாக்கவேண்டாம். இப்போதைக்கு அப்படியே முழுங்குவோம்.

தாளத்தின் த்ருதம் எப்போதும் 2 அக்‌ஷரம் கொண்டது (தொடையில் உள்ளங்கையையும் புறங்கையையும் அடுத்தடுத்து தட்டும் இரண்டு அக்‌ஷரம்). அல்ஜீப்ராவின் X போல லகுவின் அக்‌ஷர மதிப்பு மாறும். ஒவ்வொரு தாளத்திலும் சில பல லகுக்களும் த்ருதங்களும் இருக்கலாம். கூட்டினால் வருவது தாளத்தின் மொத்த அக்‌ஷரங்கள். இதை வைத்து ஒரு ஆவர்த்தத்திற்கு அந்த தாளம் போடப்படும் நேரம் நிச்சயமாகும்.

திரிபுடை தாளத்தின் இலக்கணம் ஒரு லகு இரண்டு த்ருதம். அதாவது X 2 2. இதில் X மட்டும் 1, 3, 4, 5, 7, 9 என்று இருக்கலாம். இந்த “X = எண்கள்” விதி அனைத்து தாளத்தின் லகுவிற்கும் பொருந்தும்.

படித்தவுடன் வரும் டவுட்டிற்கு பதில்: 2 நான்கில் பாதி, 8 இரு நான்குகள், 6 இரு மூன்றுகள், அவைகள் ஏற்கனவே இருக்கும் எண்களின் ஒருவகை ரிப்பீட்டு என்பதால் சேர்க்கத்தேவையில்லை.

சரி, X = 3ஆய் இருந்தால் திஸ்ரம் என்று பெயர். அதாவது, X, 2, 2 என்பது X=3, 2, 2 என்று வந்தால் அத்தாளத்தின் பெயர் திஸ்ர ஜாதி திரிபுடை தாளம். அதைப்போல X = 4 என்பது சதுஸ்ரம், அதனால் சதுஸ்ர ஜாதி திரிபுடை தாளம். அதுதான் நம்ம ஆதி தாளம். வீடியோவில் ஆதி தாளம் போட்டதை இப்போது சரிபாருங்கள். ஒரு ஆவர்த்தத்தில், முதலில் 4 அக்‌ஷரம் போட்ட விதமும், அடுத்த இரண்டு த்ருதங்கள் போட்ட விதமும் புரியும்.

சதுஸ்ரம் அடுத்து, மிச்சம் X = 5 கண்டம், X = 7 மிஸ்ரம், X = 9 சங்கீர்னம். பின்னால் இருமுறை 2, அதாவது இரண்டு த்ருதம் வருவதால் திரிபுடை தாளம்.

இப்போது நீங்கள் சொல்லுங்கள் பார்ப்போம், சங்கீர்ன ஜாதி திரிபுடை தாளத்திற்கு எத்தனை அக்‌ஷரங்கள், எப்படி தொடையில் போட வேண்டும் என்று. (பதில்: நோ, சொல்லமாட்டேன். உங்களுக்கே நிச்சயம் தெரியும், போடவும் வரும். செய்துபாருங்கள்.)

சரி, அடுத்து களை, சுருக்கமாக.

ஆதி தாளம் ஒரு ஆவர்த்தத்திற்கு 8 அக்‌ஷரங்கள். ஒரு களை சவுக்கத்தில் போட்டால், 8 மாத்திரைகளே. இரண்டு களை சவுக்கத்தில் போட்டாலும் அதே 8 அக்‌ஷரங்கள்தான். ஆனால் இரண்டு அக்‌ஷரங்களுக்கிடையே உள்ள இடைவெளி 2 மாத்திரைகளாக நீண்டு, ஒரு ஆவர்த்தத்தில் மொத்தம் 16 மாத்திரைகள் ஆகிவிடும்.

அப்டீனா, இரண்டு களையில் ஒரு ஆவர்த்தம் போடப்படும் அதே ஆதி தாளம், ஒரு களையில் ஒரு ஆவர்த்தம் போடும் அதே ஆதிதாளத்தின் நேர அளவை காட்டிலும் இரண்டும் மடங்கு நீண்டு இருக்கும்.

மீண்டும் படித்துக்கொள்ளுங்கள். இந்த சூட்சுமம் புரிந்துவிட்டால் தாளத்தில் பாதி கிணறு கிராஸ்டு.

அவ்ளோதான் சார் ஆதிதாள மேட்டர்.

*****

ஸ்டாப்ப்ப்ப் என்று நீங்கள் அலறுவது புரிகிறது.

ஒப்புக்கொள்கிறேன், மூச்சுமுட்ட விஷயத்தை கொட்டிக்கொண்டே போகிறேன். வேறுவழியில்லை. வாழ்க்கையில், கட்டுரையில், எங்காவது இதையெல்லாம் ஏதாவது ஒரு களையில், வேகத்தில், சொல்லித்தான் ஆகவேண்டும்.

[யோவ், மேலே சொன்ன பல்லவி என்னவாயிற்று? அதான் சொன்னேனே, அடுத்த பாகத்தில்ங்னா.]

*****

இப்போது மேலே விளக்கிய வார்த்தைகளுக்கு சிலவற்றிற்கு உதாரணங்கள்.

ஆதிதாளம், ஒரு களை சவுக்கத்தில் ஒரு பாட்டு. அதிலேயே ஆவர்த்தம், குறைப்பு, தீர்மாணம் போன்றவற்றை விளக்குகிறேன். எனக்கு பாட வராது, அதனால் டி.எம்.எஸ்ஸை துணைக்கு கூப்பிட்டுக்கொள்கிறேன். தன் பங்கிற்கு அவர் கே.வி.மகாதேவனையும், சிவாஜி கணேசனையும் துணைக்கு கூட்டிக்கொள்வது அவர் இஷ்டம்.

[பாட்டும் நானே http://www.youtube.com/watch?v=xg_hBWlR3h0 ]

இசை, பாடகர், வாயசைத்து நடித்தவர் என்று ஒருவருக்கு ஒருவர் சளைக்காமல் அரங்கேற்றிய பாட்டும் நானே பாவமும் நானே என்று கௌரிமனோஹரி ராகத்தில் அபாரமான பாட்டு நமக்கு பரிச்சயம். இப்பாடலின் இறுதியில் கொன்னக்கோல், மற்றும் வாத்தியங்கள் ஆதி தாளத்தில் சில ஆவர்த்தங்கள் எப்படி வாசிக்கின்றனர் என்பதை இசையை ரசித்துக்கொண்டே அனுபவியுங்கள்.

என் பங்கிற்கு சில விளக்கங்களை இந்த வீடியோவில் கொடுத்துள்ளேன்.

[பாட்டும் நானே, குறைப்பு விளக்கம் – http://www.youtube.com/watch?v=v7xUDzIkVu4 ]

பாட்டும் நானே, தீர்மாணம் விளக்கம் – http://www.youtube.com/watch?v=EEjEdtoRy10 ]

கச்சேரியில், மெயின் பாட்டில் இந்த விஷயங்களை செய்வார்கள். ரா. தா. பல்லவியிலும் தீர்மாணம் போன்றவற்றை செய்வார்கள்.

இப்போது நடை பற்றி இன்னொரு விளக்க வீடியோ

நடை என்பது ஒரு பேஸ், ஸ்பீட், வேகம். ஆனால் ஒரு தாளத்தின் இரு அடுத்தடுத்த அக்‌ஷரத்திற்கிடையே அமையும். மேலே தாள வகைகளின் பெயர்களில் வருவது போல், பஞ்ச நடைகள் உள்ளன. கேள்விப்பட்டிருக்கலாம்.

திஸ்ரம், சதுஸ்ரம், கண்டம், மிஸ்ரம், சங்கீர்னம்.

ஒரு தாளத்தில், இவை முறையே 3, 4, 5, 7, 9 என்று இரண்டு அக்‌ஷரங்களுக்கு இடையே உள்ள காலத்தை குறுந்தட்டுக்களக நிர்ணயிக்கும். ஒரே கால இடைவேளைகளை இப்படி மாறும் குறுந்தட்டுக்களாக பிரிப்பதால் பாட்டின் நடையை சுலபமாக மாற்றலாம்.

கவனிக்கவும், தாளம் அதே தான். நடை தான் வித்தியாசம். அதாவது, மேலே விளக்கிய ஆதி தாளத்தை இந்த பஞ்ச நடைகளிலும் போடலாம்.

படித்தால் மட்டும் உடனே புரியாதுதான். இருங்கள், இந்த வீடியோவில் ஆதி தாளத்தை சதுஸ்ர நடைக்கும், கண்ட நடைக்கும் வித்தியாசப்படுத்தி ஒரு சிறு விளக்கம் கொடுப்போம்.

[யூடியூப் வீடியோ சுட்டி – http://www.youtube.com/watch?v=2vAokb919Ts ]

இப்போது கீழே இரண்டு ஒலிக்கோப்புகளை கேளுங்கள். இரண்டும் கரஹரப்பிரியா ராக திரையிசை. இரண்டும் ஆதி தாளம். ஒன்று சதுஸ்ர நடையில், மற்றொன்று திஸ்ர நடையில். நீங்களே கண்டுபிடித்துக்கொள்ளுங்கள்.

மஹாராஜன் உலகை ஆளலாம்

மாதவிப்பொன்மயிலாள்

சரி, இப்போது பஞ்ச நடையும் இதோ மிருதங்கத்தில், உன்னால் முடியும் தம்பி படத்திலிருந்து (முன்னே பின்னே வேறு சீன்கள் உள்ளன; பார்த்து ரசியுங்கள்).

[யூடியூப் சுட்டி – http://www.youtube.com/watch?v=ryvkxiGrvIQ]

(என்னைவிட வயதில் சிறியவருக்கு மட்டும் சொல்கிறேன்) நடைகளை புரிந்துகொள்ள உன்னால் முடியும் தம்பி. சரிதானே?

*****

பிரேக். இளைபாறுவோம். இதுவரை ஆவர்த்தம், ஆதிதாளம், டெக்னிகலா அது இன்னா, அதை எப்படிப்போட வேண்டும், களை, அக்‌ஷரம், மாத்திரை இவைகள் இன்னா, பஞ்ச நடைகள், ஒரே தாளத்தில் பல நடைகள் இவற்றை பார்த்துள்ளோம்.

*****

முடிக்கப்போகிறேன். அதற்குமும், அடுத்த பாகத்திற்கு முன்னுரை.

ஆதிதாளம், சதுஸ்ர ஜாதி திரிபுடை தாளம். 4, 2, 2 என்ற அக்‌ஷரங்கள், மொத்தம் 8 அக்‌ஷரங்கள் கொண்டது. விளக்கினோம். அதில் கட்டுரை தொடக்கத்தில் சொன்ன சதுர் ராக பல்லவி இரண்டு ஆவர்த்தத்திற்கு வரும். அப்படியென்றால் இருமுறை 8 அக்‌ஷரங்கள், மொத்தம் 16 அக்‌ஷரங்களுக்குள் பல்லவி அமைந்திருக்கிறது. நான்கு ராகங்களும், ஒரு ஆவர்தத்திற்கு கிட்டத்தட்ட இரண்டு ராகம் என்று வரும்.

ஏன் கிட்டத்தட்ட என்றால் பல்லவி தாளத்தின் சமத்தில் தொடங்கவில்லை.

பல்லவியின் சாஹித்தியமும் (பாட்டும்) தாளமும் அதே நேரத்தில் தொடங்கினால் பல்லவி சமத்தில் ஆரம்பிக்கிறது என்று பொருள். பாட்டு தாளம் தொடங்கிய பின், அதைத் தாண்டித்தான் தொடங்குகிறது என்றால் அனாகத எடுப்பு. அதீத எடுப்பு என்றால் பாட்டு தாளம் தொடங்குவதற்கு முன்னரே தொடங்குகிறது என்று பொருள்.

இதைப்பற்றியும், இன்னபிற பல்லவி விஷயங்களையும் அடுத்த பாகத்தில் விளக்குவோம். லைட்டாய் ஒரு திரையிசை சர்ப்ரைஸ் உதாரணம் கொடுத்து இப்பாகத்தை முடிப்போம்.

நம்ம ஏ.ஆர். ரஹ்மானையே குறிப்பிடவில்லையே இதுவரை. செய்துவிடுவோம்.

ஜெண்டில்மேன் படத்தில், ரஹ்மானின் சிக்குபுக்கு ரயிலே பாட்டு பிரபலம், நமக்கு பரிச்சயம். மேலே படிக்கும்முன் சட்டென்று சொல்லுங்கள், பாட்டு எப்படி தொடங்கும்? அதாவது, சுரேஷ் பீட்டர்ஸ் பாடுகையில், பாட்டு எப்படி தொடங்கும்? சிக்கு புக்கு சிக்கு புக்கு ரயிலே என்றுதானே?

இந்தாருங்கள் வீடியோ. கேட்டுப்பாருங்கள்.

[http://www.youtube.com/watch?v=NYoByJiOTDM ]

சரி, முதலில் தாளத்தை கவனித்து பாருங்கள், மேலே சொன்ன அதே ஆதிதாளம் தான். ஒரு களை சவுக்கம். சதுஸ்ர நடையில்.

தொடக்கத்தில் கொயந்தை பாடிமுடித்ததும் வரும் இசைக்கு ஆதிதாளம் போடுங்கள். நான்கு ஆவர்த்தத்தில் முடிந்துவிடும். ஆனால் முடிகையில் இரண்டு அக்‌ஷரம் அமைதி. பிறகு சமத்தில் சுரேஷ் பீட்டர்ஸ் பாட, பாடல் தொடங்கும். ஆனால் பாட்டு சிக்கு புக்கு சிக்கு புக்கு ரயிலே என்று தொடங்காது. புகு சிகு புகு சிகு புகு ரயிலே என்று தொடங்கும்.

அடுத்த சுற்றில், இரண்டாவது முறை பல்லவியை சொல்கையில், சமத்தில் டிரம்ஸ் அடி விழுந்ததும், சற்று காலம் தள்ளியே, சிகு புகு சிகு புகு ரயிலே என தொடங்கும். இதை சரிகட்டதான் சுரேஷ் பீட்டர்ஸ் முதல் சுற்று தொடக்கத்தில், சமத்தில், ஒரு புகு சேர்த்து தொடங்குவார்; சின்ன பொண்ணிவ படிப்பது எத்திராஜா என்றெல்லாம் கேட்டுவிட்டு மீண்டும் பல்லவியை தொடங்குகையில் புகு சிகு புகு சிகு என்று கோரஸாய் தொடங்கும்.

ஆதி தாளம் தான். அதன் சமத்தில் இப்பாடலை தொடங்க வேண்டுமென்றால் புகு வில் தான் தொடங்கமுடியும். விட்டு சிகுவில் தொடங்கினால், சமத்தை விட்டு சற்று தள்ளி தொடங்கவேண்டும். இப்படி செய்தால் அனாகத எடுப்பு என்று பெயர்.

இந்தாருங்கள் என் விளக்க வீடியோ.

http://www.youtube.com/watch?v=iMC8x9NWb08

ஒரு களை சவுக்கத்தில் ஆதி தாளத்தில் இப்பாடல் அரை இடம் தள்ளி தொடங்குகிறது. அதாவது கையை தொடையில் சமத்தில் தட்டிய முதல் அக்‌ஷரத்திற்கும் அடுத்து சுண்டுவிரலை விடும் இரண்டாம் அக்‌ஷரத்திற்கும் நடுவில் சிகு வருகிறது.

ஸோ (ஆகையால்), சிகு புகு சிகு புகு ரயிலே என்று பாட்டை சொன்னால், இப்பாடல் ஆதி தாளத்தில் அனாகத எடுப்பு பாடல். மேலும் பல உதாரணங்கள் அடுத்த பாகத்தில்.

இப்போது பாருங்கள். கட்டுரை தொடக்கத்தில் சொன்ன சதுர் ராக மாலிகை பல்லவி இரண்டு ஆவர்த்தம், இரண்டு களை சவுக்கம் (இரண்டு அக்‌ஷரங்களுக்குள் ஒரு களையை விட இரு மடங்கு நேர அவகாசம்). இப்பல்லவியும் அனாகத எடுப்பே. தாளத்தின் சமத்தில் இருந்து முக்கால் இடம் தள்ளி.

கர்நாடக இசையா கொக்கா. அடுத்த பாகத்தில் பார்ப்போம்.

*****

ராகம் தானம் பல்லவி – பாகம் 3

Standard

ராகம் தானம் ஆயிற்று. இப்பாகத்தில் பல்லவி பற்றி அறிமுகம்.

தொடங்கும்முன் அறிமுகத்திற்காகவே இக்கட்டுரைகளை படிப்பவர்களுக்கு ஒரு வார்னிங். பல்லவிக்கு நேரடியாக பல சம்பந்தமில்லா விஷயங்களை சொல்வதுபோல் முதலில் தோன்றும். ஆனால் இவைகளை ஒரளவு அறிமுகம் செய்துகொண்டால்தான் பல்லவியின் உன்னத கட்டுக்கோப்பை கோடிகாட்டலாம். புரிந்து ரசிக்கலாம். அநேகமாக கட்டுரையின் அடுத்த இரு பாகங்களுக்குள் அனைத்தையும் ஒருங்கிணைத்துவிடுவேன். அதேபோல் அன்பர்கள் கேட்டதில் ஓரிரு கேள்விகளுக்கு இங்கு பதில் கூறவில்லை (சிலவற்றிற்கு கட்டுரையினூடே கூறியுள்ளேன்). அடுத்த பாகம்வரை பொறுத்திருங்கள். ஆங்காங்கே புரியவில்லையென்றால் தயங்காமல் அப்பத்தியை விட்டு மேலே படித்துக்கொண்டே செல்லுங்கள். ஒலிக்கோப்புகளையும் கேளுங்கள். நம் சங்கீதம் என் விளக்கங்களையும் மீறி நமக்கு நிச்சயம் புரியும். சந்தேகம்/தவறுகள் இருந்தால் மடலிடுங்கள் அடுத்த பாகத்தில் சரிசெய்துவிடுவோம்.

பல்லவி என்றால் பதம் லயம் வின்யாசம் (ப-ல-வி) இவற்றின் கூட்டு என்பர். இப்படி யார் முதலில் வகுத்தது என்று தெரியவில்லை. பதம் என்றால் சாஹித்யம் அல்லது பாட்டு வரிகள். லயம் என்றால் என்ன தாளம், கால இடைவெளிகளில் பாடுகிறோம் என்பது. வின்யாசம் என்றால், கற்பனைவளஞ்செரிய ராகத்தையும், லய கணக்குகளையும் இசையாய் வெளிக்காட்டுவது.
Continue reading

ராகம் தானம் பல்லவி – பாகம் 2

Standard

முதல் பாகக் கட்டுரையில் எனக்குத் தெரிந்தமட்டில் மூன்று பிழைகள் இருந்தன (திருத்திவிட்டேன்). எம்.எஸ்.ஷீலா கர்நாடகா. வாக்கியத்தில் ஆந்திரப்பாடகர்களுடன் சேர்த்துவிட்டேன். ஆனாலும் அவரும் அநேக கச்சேரிகளில் ரா.தா.ப. பாடுவார். 1965 கலாநிதி ஆலத்தூர் வெங்கடேச ஐயர் என்று குறிப்பிட்டுவிட்டேன். சரியானது ஆலத்தூர் சகோதரர்களே. அதைப்போல அரியக்குடி ஐம்பதுகளில் (1950) கொண்டுவந்த கச்சேரி பாணி என்று எழுதியிருந்தேன். 1930 40 களிலே அவர் அதைசெய்துவிட்டாராம். முன்னூறு வயது மதிக்கத்தக்க என் இசைநண்பர் குட்டுகிறார். மகிழ்ச்சி.

அடுத்து, ராகம் தானம் பல்லவி அங்கத்தில் பாடப்படும் ராக ஆலாபனை, கச்சேரியில் வேறு கீர்த்தனை முன் பாடப்படும் ஆலாபனையிலிருந்து வித்தியாசப்படுமா?

அடிப்படையாக வித்தியாசப்படாது. அதே ராகம் அதே ஆலாபனைதான். ஆனால் பாடும் முறையில் சிறு வித்தியாசம் இருக்கிறது. ஆலாபனை என்றால் ராக ஸ்வரங்களை ஸ, ரி, க என்று சொல்லாக்காமால், ஆ , உம், நும், என்பதுபோல சப்தங்களாக தொடராக கற்பனைத்திறனுக்கேற்ப படிப்படியாக பாடுவது. ஒவ்வொரு ராகத்திற்கும் சிறப்பு ஸ்வரக்கோர்வைகள் (பிடிகள்), கமகங்கள், கார்வைகள் இருக்கிறது. அவற்றையும் ஆலாபனையில் வெளிப்படுத்தவேண்டும். ஒரு உதாரணம் ஒலிக்கோப்பில்.

மேலே காம்போஜி ராகத்தில் டாக்டர் எஸ். ராமநாதன் தானத்திற்கு முன் ஆ லாபனை செய்கிறார். முதலில் வரும் ஸ்வரக்கோர்வை காம்போதியின் பிடி. பாடியவுடன் இது காம்போதி ராகம் என்று தெரிந்துவிடும்.

கீர்த்தனை முன் ஒரே டேக்கில் பாடகர் ராக ஆலாபனை, பின் வயலின் ஆலாபனை. ரா.தா.ப. ஆலாபனையில் இரண்டு மூன்று சுற்று பாடகரும் வயலின்காரரும் பரிமாறிக்கொள்வர். இதனால், முதல் சுற்றில் மெதுவாகவும், மிதவேகத்திலும் (மத்தியமகாலத்தில்), அடுத்த சுற்றுக்களில் வேகமாகவும் (துரிதகாலத்தில்) பாடலாம். விலம்பகாலத்திலேயே (மிகமெதுவாக) ஆலாபனை மொத்தத்தையும் செய்துமுடிக்கலாம். பாடகரை பொறுத்தது.

அடுத்ததாக தானம் எனும் அங்கத்தின் உபயோகம் என்ன? உதாரணமாக, வர்ணம் கச்சேரி முதலில் பாடுவது, தொண்டையைப் பதப்படுத்திக் கொள்வதற்கேற்ற வகையில் இருக்கும். இதுதான் அதன் தேவை  என்று ஒரு கருத்து உள்ளது. இதே போல் தானம் என்பதின் அவசியம் என்ன, எதற்கு இதை செய்துகட்டவேண்டும்?

தானம் பற்றி விளக்கம் கூறுவதற்கு முன் வர்ணம் பற்றி நிலவும் கருத்திற்கு ஒரு சிறிய ம்ஹூஹும். டி.ஆர்.சுப்பிரமணியன் நல்ல குரலில் கச்சேரி முதல் பாட்டாய் மங்களமும், இறுதியாய் வர்ண மும் பாடியுள்ளார். இப்படி குரல் பதப்படுத்தல் சமாச்சாரங்களை உடைத்தெறியவே. சமீப கச்சேரிகளில் டி.எம். கிருஷ்ணா கணீரென்று வர்ணத்தை மூன்றாவதாயும், கச்சேரியின் பிரதான உருப்படியாகவும் (2006 என்று நினைக்கிறேன், மைலாப்பூர் ஃபைன் ஆர்ட்ஸ் கிளப், கானடா வர்ணம்), ரா.தா.ப. வாகவும் (2008 மியூசிக் அகதெமி – விரிபோணி பைரவி ராக வர்ணம்) பாடியுள்ளார். வர்ணம் = கச்சேரி முதல் பாட்டு = குரல் பதப்படுத்துதல் என்பதெல்லாம் ஒரளவே சரி. சங்கீத சட்டமில்லை.

தானம் என்பதும் ஒருவகையில் குரல் சரிசெய்தல், அல்லது விருத்திசெய்யும் பயிற்சியாகவே இருந்திருக்கிறது. சரளிவரிசை, ஜண்டைவரிசை, வர்ணம், பிறகு தானம் என்று கொள்ள லாம். ஆலாபனையில் ஆ  என்று சப்தம் தொடர்சியாய் வருவது போல் ராக ஸ்வரங்களை ராக லக்‌ஷணத்திற்கு (இலக்கணம்) ஏற்ப கோர்த்து பாடுவார்கள். இதை மொத்தமாக கீதம், மெலடி, என்று புரிதலுக்காக வைத்துக்கொண்டால், தானத்தில் இவ்வாறு இல்லை. ஸ்வரமும் (கீதமும்) லயமும், மெலடியும் ரிதமும் சேருகிற இடம் தானம். சொல்லற்ற இசைவடிவிலிருந்து ராகத்தை சொற்களோடு உறவாட வைக்க எத்தனிக்கும் கருவி தானம்.

அதனால் ராக ஸ்வரங்களை தானத்தில் வேறுவிதமாய் சற்று சந்தம் வருவதுபோல பாடவேண்டும். ஆங்கிலத்தில் ஸ்டக்காட்டொ (staccato) என்பார்கள். ஸ்வரங்களை 3, 4, 5, என்று (ராகம் அனுமதித்தால்) சிறு சிறு ஸ்வரக்கோர்வையாய் உடைத்து உடைத்து பாடுவது. இப்படி பாடுகையில் அனந்தம் என்ற சொல்லையும் அதற்கேற்றவாறு உடைத்து பொருத்தி பாடவேண்டும். முடிவில் வழுக்கி இழுத்து ராக ஸ்வரூபம் தெரியுமாறு முடிக்கவேண்டும். ஆ …னந்தத்…..தா…னம்…தந்த… ஆஅஆஅ        ஆ   அ  ஆ  அ   ந ந்   த   த் தக  அ  அ  த க அ  அ  இப்படிப் போகும்.

கீழே கமலமனோஹரி ராகத்தில் சேஷகோபாலன் தானம் ஒலிக்கோப்பை கேட்டுப்பாருங்கள். தீக்‌ஷதரின் கஞ்சதலாயதாக்‌ஷி கீர்த்தனையை நினைவுபடுத்திக்கொள்ளுங்கள்.

மிருதங்கத்திற்கு தத்தகாரம் போல கீர்த்தனைக்கு தானம். எங்கெங்கு பல்லவியில் வார்த்தைகளை ஒதுக்கி அமைக்கவேண்டும் என்பதற்கு தான ஸ்வரக்கோர்வைகளை உபயோகித்துதான் வகுப்பார்கள்.

தானத்தின் மூலம் கீர்த்தனை எப்படி தோன்றும் என்பதற்கு திரையிசையில் ஒரு கிட்டத்தட்ட உதாரணம் எம்.எஸ்.வீ./கண்ணதாசனின் சிப்பியிருக்குது முத்துமிருக்குது (வறுமையின் நிறம் சிவப்பு படப்) பாடல்.

இப்பாட்டிலிருந்து சிறு உதாரணம். மெட்டையே தனனா தனனா தானா என்கையில் மூன்று, மூன்று, இரண்டு ஸ்வரங்களாய் பிரிப்பது புரியும் என்று வைத்துக்கொள்கிறேன். இத ற்கு கவிஞர் (வேறு யார் செய்வர்?) உடனே மழையும் வெயிலும் என்ன என்று வார்த்தைகள் தருகிறார். ம-ழை-யும் வெ-யி-லும் என்-ன  என்று 3, 3, 2 ஸ்வரங்களுக்கு பொருந்துமாறு வார்த்தைகளின் அக்‌ஷரங்கள் வருகிறது பாருங்கள்.இசையா, சாஹித்தியமா, இசையமைப்பாளரா கவிஞரா யார் முந்தி? சொல்வது கடினம்.

இதையே தியாகையர் ஒருவரே செய்கையில் வெளிப்படுவது பஞ்சரத்ன கீர்த்தனைகள், ரத்தினங்கள், அபாரங்கள். வார்த்தைகள் தமிழா தெலுங்கா, இசை ஸ்வரம் என்ன ராகம், ரகம், என்றெல்லாம் கவலையின்றி திளைக்கவைக்கும் ஸ்வர-சாஹித்திய (இசை-வரி) பெர்ஃபெக்ட் மாட்ச். இவ்வகையில் அஜ, , கஜ , மயூர என்று ஏற்கனவே குறிப்பிட்ட பல வகை தான வகைகளை அடக்கியுள்ளது தியாகைய்யரின் பஞ்சரத்ன கீர்த்தனைகள். சுருதியும் லயமும் பிரிக்கமுடியாதவகையில் ஒருங்கே அமையப்பெற்ற ஸ்வர-ராக-லய -சாஹித்திய இசை கற்பனைவெளிப்பாட்டின் உன்னதம். ஒரு சாம்பிள் கீழே.

திரையிசையில் தானத்தை கொண்டே இசையமைத்தவர்களையும் கூடவே ஏற்ற வார்த்தைகளை பாட்டாய் பொருத்தியவர்களையும் பாட்டைவைத்தே சுலபமாக கண்டுகொள்ளமுடியும். இன்னொரு காம்பினேஷனில் சட்டென்று ஞாபகம் வரும் இன்னொரு உதாரணம் சிந்துபைரவி திரைப்படத்தில் தானமாகவே தொடங்கி, வரிகளை தானம்-த என்று தானமாகவே உடைத்து, வார்த்தைகளை மோ-க—ம் என்–னும் என்று ஒதுக்கி ஒதுக்கி பாடப்பட்டு உச்சியை அடைகையில் அகாரமாகிவிடும் மோகம் என்னும் தீயில் என்மனம் வெந்து வெந்து உருகும் என்ற பாடல். விடியோவில் கேட்டுப்பாருங்கள்.

http://www.youtube.com/watch?v=rd8_rwlUWCE

எனக்குத் தெரிந்து கனகாங்கி ராகத்தில் வந்துள்ள முதல் (கடைசியுமான?) திரைப்படப்பாடல் இது. வெங்கடமஹி வகுத்த மேளகர்த்தா வரிசையில் கனகாங்கி முதல் ராகம். ஸ, ரி1, கா1, ம1, ப, த1, நி1, ஸ  என்று ராக ஸ்வரங்கள். ஸ  ரி1 க1 அனைத்தும் அருகருகே ஸ்வர ஸ்தானங்கள் (ஒலிகள்) கொண்டது. அதேபோல ப த1 நி1 அருகருகே ஒலிப்பவை. சேர்த்து பாடுகையில் காதால் பாகுபடுத்தி கேட்க முடிந்தாலும், மனதில் சற்று நாராசமாய் ஒலிக்கும். இதைப்போல் ஸ்வரக்கூட்டல்கள் உள்ள ராகங்களை விவாதி ராகம் என்பார்கள். விவாதியில் பாடுவது கடினம். பாலமுரளிகிருஷ்ணா, தஞ்சாவூர் கலியாணராமன் போன்ற சிலரே கச்சேரி மேடைகளில் திறம்பட செய்திருக்கிறார்கள். வேரொருசமயம் விரிவாய் பார்ப்போம்.

மேலே பாடலை கவனித்தால் இளையராஜா ஒரே இசை வாக்கியத்தில் (மெலடியில்) அனைத்து ஸ்வரங்களையும் ஒன்றுசேர்த்து வடிக்காமல், ஸ  ரி1 க1 ம இவற்றில் சில ஸ்வரக்கோர்வைகளையும், பின் தாண்டிபோய், ப த1, நி1 ஸ  என்றும் அமைத்திருப்பார். கேட்கவும் நாராசமாய் தோன்றாது. சிலிர்ப்பாய் இருக்கும். பாட்டின் முடிவில்தான் ஒரே மூச்சில் ஒரே வரியில் ராக ஸ்வரங்கள் மொத்தத்தையும் பாடி மேல்ஸ்தாயிவரை சென்று பஞ்சமம் தொட்டு, பளிச் என்று தந்தி அறுந்துவிடும். யேசுதாஸின் அபார அகார பயிற்சி வெளிப்படும் பாடல்.

(எம்.எஸ்.வி., ராஜா, என்று ரஹ்மானை விட்டுவிட்டீரே என்று சண்டைக்குவராதீர். வேறு விஷயத்தில் வேறு இடத்தில் குறிப்பிடுகிறேன்)

அருணகிரிநாதரின் திருப்புகழ் அநேகமாக அனைத்துமே சந்தத்தாளங்கள். இன்றைய கச்சேரிகளில் இறுதியில் மங்களத்திற்கு முன் திருப்புகழ் பாடுவார்கள். வார்த்தைகளை நீக்கி ஸ்வரங்களாக நினைத்துப்பார்த்தால், தானம் பாடுவது போலவே இருக்கும்.

திருப்புகழ் பாடப்படுகையில் இன்று நாம் அநேகமாக சீட்டின் நுனியில், கையில் பை, குடை, பிடித்தபடி, எப்படா ’பெருமாளே’ வரும் என்று எழுந்துசெல்ல காத்திருக்கிறோம்.

இப்போது ஆர்வமிருப்பவர்களுக்கு சற்று ஆராய்ச்சி விஷயங்கள் கூறி, சில ஒலிக்கோப்பு உதாரணங்களுடன் இப்பாகத்தை முடிக்கிறேன்.

தானம் என்றால் அனந்தம். முடிவில்லாதது. பரதமுனிவர் தானத்தை ஒரு வகை மூர்ச்சனையாகத்தான் (ஸ்வரக்கோர்வை) கருதியுள்ளதாக தெரிகிறது. ஆனால் பின்னால் சாரங்கதேவர் தன்யந்தே விஸ்தார்யந்தே இதி தானஹ எனும்போது தானம் என்பது விஸ்தாரமாக, விவரமாக செய்யப்படவேண்டியது என்று புரிகிறது. டாக்டர் வேதவல்லி தானத்தை பற்றி பலவிஷயங்களை தன் Ragam Thanam Pallavi – their evolution, structure and exposition (1995) புத்தகத்தில் குறிப்பிட்டுள்ளார். அதில் ஆலாதிகளில், கட்டாலாதி தா அ  அ  ந அ  அ  தத் தத் தா அ  அ  நம் தத் தா அ  அ  என்று சிறு ஸ்வரக்கோர்வைகளாக ஒலிக்கையில், இன்று இருக்கும் தானம் வடிவத்திற்கு ஒப்பானது என்று குறிப்பிடுகிறார்.

தானத்தை மத்தியமகாலத்தில்தான், மிதமான வேகத்தில்தான் பாடவேண்டும் என்று ஒரு நியதி இருக்கிறது. அப்பொழுதுதான் கேட்க நன்றாக சுகமாக இருக்கும் என்று. இல்லை, பல  காலப்பிரமாணங்களில் பாடலாம் என்றும் ஒரு கட்சி இருக்கிறது. அட்லீஸ்ட் மூன்று வேகங்களில் (த்ரிகாலத்தில்) பாடமுடியும். மெதுவாக பாடுவதற்கு ராக ஞானம் சூட்சமங்கள் வேண்டும். வேகமாக பாடுவதற்கு அப்பியாசம் தேவை.

மேலே சிந்து பைரவி பாட்டு கூட அநேகமாக மத்தியமகாலத்தில்தான் இருக்கும். கேரளத்தில் ஸ்வாதித்திருநாள் குடும்பத்தவரின் நவராத்திரி உற்சவத்தில் தானம் தாளத்துடன் மத்தியமகாலத்தில் பாடப்படும். சிலசமய ம் மிருதங்கம் துணையுடன். கீழே டாக்டர் எஸ்.ராமநாதன் பாடியுள்ள காம்போஜி ராக தானத்தின் தொடக்கம். மத்தியமகாலத்தில் மிருதங்க பக்கத்துடன் (வயலின் வாசிக்கையில் மிருதங்கம் நன்றாக கேட்கும்).

முன்னர் குறிப்பிட்டபடி வேதவல்லி மத்தியமகால தானத்தில் நிரம்ப அப்பியாசம் பெற்று தேர்ந்தவர், சிறந்தவர். கேட்கையில் நம்மை அறியாமல் கண்ணைமூடியபடி எழுந்து ஆடவைத்துவிடுவார்.

சேஷகோபாலன் போன்றோர் பல  காலப்பிரமாணங்களில் தானம் செய்து உலுக்கிவிடுவர். கேட்கும் நமக்கும் வியர்த்துகொட்டிவிடும். இதோ ஒரு சேஷு ஸ்பெஷல்.

அதேபோல ராகங்களுக்கு ஏற்றவாறு தானத்தின் வெளிப்பாடு சற்று மாறும். நாட்டை ராகத்தை உடைத்து உடைத்து ஸ்வரத்துண்டுகளாய் தானம் பாடுவது நன்று. எளிது. ஆனால் வராளியை இழுத்து இழுத்துதான் பாடவேண்டும். இதற்குமேல் வார்த்தையில் இதை விளக்கமுடியாது. வீணையில் மைசூர் துரைசுவாமி ஐயங்கார் வாசிப்பதை கேட்டுப்பாருங்கள்.

1) நாட்டை

2) வராளி

தானம் பாடுவதின் அடிப்படை தான வர்ணங்களில் உள்ளது என்று கொள்ளலாம்.இவ்வர்ணங்களில் வரும் சாஹித்திய வார்த்தைகளை நீக்கி தானக்‌ஷர  அனந்தம் வார்த்தையை உடைத்து பொறுத்தி பாடினால் தானம் போலவே இருக்கும். இவ்வகையில் பச்சிமிரியம் ஆதியப்பா இயற்றிய பைரவி ராக விரிபோணி வர்ணம், தான வர்ணம்.இதை ராகம் (ஆலபனை), தானம் செய்து பிறகு பிரதானமாக டி.எம்.கிருஷ்ணா 2008 அகதெமி கச்சேரியில் பாடியது பொருத்தமே. பிரதான அங்கத்திற்கான அனைத்து விஷயங்களூம் கொண்டது இப்பைரவி ராக வர்ணம். என் போன்ற விமர்சன அல்லக்கைகளை விட்டு, விஷயம் தெரிந்தவர்களிடம் கேட்டால் சொல்லுவார்கள். ஏன் வர்ணத்தை பிரதான உருப்பிடியாக பாடுகிறார் என்று, சபையில் ரசிகர்களாய் நாம் விஷயம் பிடிபடாத ஆச்சர்யத்தில் புருவத்தை உயர்த்தலாம். முகத்தை சுளிப்பது, அறியாமை கலந்த ஒருவகை அடாவடித்தனம்.

*****

ராகம் தானம் பல்லவி – பாகம் 1

Standard


ஆழ்வாரின் கிளரொளி இளமையொத்த தற்கால கச்சேரி மூட்டைகளில் வழக்கொழிந்துபோய்கொண்டிருக்கும், கர்நாடக சங்கீதத்திற்கு இன்றியமையாத அங்கங்களில் ஒன்று, ராகம் தானம் பல்லவி. சுருக்கமாக ரா.தா.ப. (RTP). சென்ற வருடத்தில் சொல்வனம் இணைய இதழில் கட்டுரைத்தொடராய் இதைப்பற்றி எழுதிக்கொண்டிருந்தேன் (தொடர் இன்னும் முடியவில்லை). இவ்வலைப்பதிவில் என்னைத்தொடர்ந்து வாசித்துவருபவர்களுக்காகவும், தமிழில் எழுதியவைகளை ஓரிடத்தில் திரட்டும் முழுமைக்காகவும் இங்கு  சொல்வனம் கட்டுரைகளின் சற்று திருத்திய, பத்திகளை விளக்கங்களை சற்று மாற்றியமைத்த வடிவத்தை வெளியிடுகிறேன். மூலத்தை என்றும் சொல்வனத்தில் படித்துக்கொள்ளலாம்.

கட்டுரைத்தொடரில் கர்நாடக சங்கீதத்தையே அறிமுகத்தளத்தில் விளக்க முற்படவில்லை. அதைப்பற்றிய கேள்வியறிவும், அதைக் கேட்பதற்கான நாட்டமும் உள்ள ரசிக வாசகர்களிடம் கச்சேரியின் பிரதான உருப்படியான ரா.தா.ப. வை பற்றி ஒரளவு விவாதித்து, விமர்சித்து, ரசித்து, திரையிசை உதாரணங்களையும் இல்லார்வல விளக்க வீடியோக்களையும் உபயோகித்து, அறிமுகப்படுத்துவதே நோக்கம். அதாவது, ராகம் தானம் பல்லவியை ஏற்கனவே இசை தெரிந்தவர்களுக்காகத்தான் அறிமுகம் செய்கிறது. அதில் சந்தேகம் வேண்டாம். எவ்வளவு தெரியவேண்டும் என்பதில்தான் அபிப்பிராயபேதம். சில சங்கேதவார்த்தைகள் புரிதலுக்கு இடையூறு போல் தோன்றும். உதாரணமாய், சௌககாலம் என்று கட்டுரையில் வரும் சங்கீத பிரத்யேக வார்த்தைக்கு சட்டென்று அர்த்தம் தெரியவில்லையென்றால், அதை விடுத்துக் கடந்து படித்துக்கொண்டே சென்றாலும்  ஓரளவு கட்டுரை விஷயங்கள் புரியுமாறே அமைத்திருக்கிறேன்.

ஆனால் இசையை படித்தே புரிந்துகொள்ளமுயல்வது, நீச்சலையோ சைக்கிளோட்டுவதையோ புத்தகத்தில் மட்டுமே படித்துவிட்டு கற்க எத்தனிப்பதைப்போன்றது. சைக்கிளோட்டுவது எப்படி என்ற புத்தகத்தில் சைக்கிளைபற்றி ஹாண்டில்பார், பால்ரஸ், பெடல் என்று அன்றாடம் அதுவரை பேசும் மொழியில் இல்லாத சில சைக்கிள் ஓட்டும் துறை சார்ந்த வார்த்தை பிரயோகங்கள் இருந்தே தீரும். ஹாண்டில்பார் என்றால் என்ன என்று சந்தேகம் வரலாம். சைக்கிள் பற்றி தெரிந்தவரிடம் கேட்டுதெரிந்துகொள்ளலாம். ஆனால் விளக்குபவர் சைக்கிள் முன்னாடி வளைந்து கையால் பிடித்துகொள்வதுபோல் இருக்குமே என்று விளக்குகையில் அவர் கேள்விகேட்பவர் சைக்கிளை ஏற்கனவே பார்த்திருப்பார் என்றே விளக்குகிறார். இல்லையெனின் இவ்வகை விளக்கம் வீண். அதுபோல்தான் என் ரா.தா.ப.. கட்டுரை அறிமுகமும். கர்நாடக இசை சற்றேனும் கேட்டிருக்கவேண்டும். ராகம், ஆலாபனை ஸ்வரங்கள், தாளம் போன்ற வார்த்தைகளின் இசை அர்த்தங்களுடன் பரிச்சியம் இருக்கவேண்டும். ரா.தா.ப.. என்பதை மட்டுமே விளக்குகிறேன். கர்நாடக இசையையே அல்ல.அதையும் செய்யலாம், ஆனால் தனிக்கட்டுரைகளில்.

அதனால், சிலவார்த்தைகள் புரியவில்லை என்றால், கவலையின்றி, அவ்வார்த்தைகளை விட்டுவிட்டு நம்பிக்கைவைத்து சைக்கிளை குரங்குபெடல் அடித்தாவது ஓட்டிப்பாருங்கள். முடிந்தவரையில் கட்டுரையை அப்படித்தான் அமைக்கமுயல்கிறேன். ஆனால் கூடவே உங்கள் பங்கிற்கு ரா.தா.ப. வருகிற சில கச்சேரிகளுக்கு நேரடியாக செல்லுங்கள் (சேஷகோபாலன், சஞ்சய், ரவிகிரண், காயத்ரி, டி.எம்.கிருஷ்ணா போன்றோர் அநேக கச்சேரிகளில் செய்வர்). வயதான தாத்தா பாட்டிக்கள் அருகில் அமருங்கள். இதுதான் ரா.தா.ப. வா என்று தயங்காமல் கேட்டுத்தெரிந்துகொள்ளுங்கள். இல்லை ஒத்தவயதுடைய இசைநண்பர் அழைக்கையில் ஒரு கச்சேரிக்காவது உடன் செல்லுங்கள். அவரை கேட்கவிடாமல் சன்னமாய் கேள்வி கேட்டுதுளையுங்கள். கை தட்டுகையில், ஆஹா பேஷ், உச் உச் என்கையில், ஏன் எதற்கு எந்த விஷயத்தை பாரட்டுகிறாய் என்று கேட்டு (அவர் மேடையில் இசையை ரசித்திருக்கும் பட்சத்தில்) தெரிந்துகொள்ளுங்கள். சைக்கிளோட்டுவதுபோல சில சிராய்புகளுக்குப்பின் கர்நாடக இசை கேட்பது நிச்சயம் பிடிக்கும். ஒரே முக்கிய தேவை பொறுமை. மீண்டும் இக்கட்டுரைகளை படிக்கையில் ரா.தா.ப. அறிமுகம் புரிதலை மேம்படுத்த உபயோகமாகலாம்.

சிலவற்றை விளக்காமல் விடுவதற்கு அடுத்த காரணம், நான் இங்கு எழுதுவது அனைத்தையும் பாடமாக விளக்கி நூற்றாண்டுகளாக ஏற்கனவே பல  இசைப்புத்தகங்கள் உள்ளன. மொத்தத்தையும் ஒரே (அல்லது மூன்று நான்கு) கட்டுரையில் இங்கு என்றால், என்றால் என்று விளக்குவதன் மூலம் நாம் புரிந்துகொள்ள முற்படுவது சரியல்ல. கூடவே இசையை கச்சேரியில் சென்று நிறைய கேட்கவேண்டும். மேலும் அப்படி விளக்க முற்பட்டால் நீ பெரிய குடுமியா, கர்நாடக இசையை காலை காப்பியில் கலக்கி அடித்த இவனாட்டம் ஜெர்க்விட்டு போரடிக்கிறாப்போல பாடம் நடத்தரே என்று அயர்ச்சியில் எண்ணவைக்கும்.

தமிழர்களின் கலைப்பொக்கிஷமான கர்நாடக இசை, கட்டுரை வார்த்தைகளின் பாதிப்பை தாண்டியது. என் குறை எழுத்து ஏற்படுத்தும் சாதக பாதக மனக்கிளர்ச்சியை விடுத்து, ஊடுருவி, இசையை மட்டும் அணுகுங்கள். அதுதான் நிஜப்பயன்.

இனி ரா.தா.ப. பற்றி விவாதிப்போம்.

*****

ஒரு நூற்றாண்டிற்கு முன் ராகம் தானம் பல்லவி தான் கச்சேரியை தொடங்கியதாம். பல  வேளைகளில் ஒரே பல்லவியே மொத்த கச்சேரியாகவும் வியாபித்து பரிமளிக்கும். ஆனால் இக்கால – முக்கியமாக, சென்னை டிசெம்பர் சீசன் – கச்சேரிகளை கவனித்தால், பெரும்பாலும் இப்படி அமைந்திருக்கும். 1 வர்ணம், 1 சப் மெயின், 1 மெயின் உருப்படி், 1 சொதப்பல் முயற்சி (புது ராகம், இல்லை கீர்த்தனை), 1 அபார முயற்சி (அந்த சீசனிற்கு கலைஞரின் உழைப்பு), 3 துக்கடா, 2 பஜன், 1 மங்களம் (ரசிகர்கள் எழுந்து செல்வதற்கான பின்னனி இசை) ஆகிய பத்துப்பாட்டு. இவ்வகை கச்சேரிகள் அனைத்து தர கர்நாடக ரசிகர்களையும் திருப்தி செய்யும், இரண்டரை மணி நேர, தலை கலையாத, நேர்வகிடு சமாச்சாரங்கள்.

நகர வாழ்கையின் அவசர கதி சிலுவையில் அறையப்பட்டுள்ள இக்கச்சேரிகளில் விஸ்தாரமான இரண்டு மணிநேர ராகம் தானம் பல்லவியை எதிர்பார்ப்பது அறிவியல் துறைகளில் இந்தியாவிலிருந்தபடியே இந்தியர் நோபல் வாங்க வேண்டும் என்று ஆசைப்படுவதற்கு ஒப்பானது. என்றாவதே நடக்கலாம்.

இத்தேய்மானம் ஒன்றும் புதிதல்ல. ஒருவிதத்தில் தற்கால சங்கீதகச்சேரி என்ற அமைப்பே அரியக்குடியார் ஐம்பதுகளில் (1950) கொண்டுவந்த கர்நாடக சங்கீத தேய்மானம்தான். இதனால் விஸ்தாரமாய் நுணுக்களை கவனித்து கேட்டு புரிந்துகொள்ளுமாறு மணிக்கண க்கில் ஒருசில கீர்த்தனைகளையும் ராகங்களை மட்டுமே பாடிவந்த முறை க்ஷீனித்தது என்பர்.

நாள் முழுக்க சில பாட்டுக்களே விஸ்தரித்து பாடி, நுணுக்கங்களை அனுபவிப்பதற்கான உல்லாச நேர அவகாசங்களும், சங்கீதக்கலையைத்தான் பொழுதுபோக அனுபவிக்கவேண்டும் என்ற தேவைகளும் தொழில்நுட்ப விழிப்புற்ற மக்களிடையே குறைந்து வருகிறது. சில பாட்டுக்களை மட்டும் பாடி, கர்நாடகசங்கீதத்தை கேட்கும் மக்கள் எண்ணிக்கையை போரடித்தே குறைக்கக்கூடாது என்றுதான், விஸ்தாரமான யானைக்கட்டி போரடித்தால் ரசிகர்க்கு மாளாது என்று துரித குதிரைகட்டி போரடிக்கப்பார்த்து, மூன்று நான்கு மணிநேர பலசரக்கு உருப்படிகள் அடங்கிய கச்சேரி என்று அரியக்குடியார் கொண்டுவந்தார்.

மேலும் சில மணி நேரங்களே பிடிக்கும் கச்சேரி முறையில் கலைஞர்கள் சங்கீதத்தை ஊர் ஊராய் சென்று வயிற்றுப்பொழைப்பாக செய்ய முடியும். மாதத்தில் பல கச்சேரிகள் செய்யலாம்.அதேபோல் இசை கேட்கும் ரசிகர்களும், குவித்து, பாத்திகட்டி சாம்பார்சாதத்தை மட்டுமே வெட்டி நாக்கு செத்துபோய் சாப்பிடுவதையே குறைத்துக்கொள்ளாமல், இலையில் பல பதார்த்தங்களை பார்க்கையில் பசி வள ரும்.சில புரியாத பதார்த்தங்கள் இருந்தாலும், புரிபவையும் இருப்பதால், விரும்பி பலமுறை சாப்பிடுவார்கள்.

இக்கச்சேரி அட்டவணையை எழுபது என்பதுவரையில் டெஸ்ட் மாட்சுகளாக விஸ்தரித்து ஆடிவந்தவர்கள், சமீபகாலங்களில் ஐந்து நாள் டெஸ்ட் மாட்ச் பாணி கச்சேரியை வழக்கொழித்து, ஒருநாள் ஆட்டமாக்கி, இப்போது டுவெண்டி டுவெண்டியில்தான் காசு புரள்கிறது, என்று சுருக்கியுள்ளனர்.

கச்சேரிகளை மட்டும் நம்பி பொழப்பை நடத்தும் வித்வான் பாப்புலராக இருக்கவேண்டுமெனில் சில அநாவசியங்களை, அனுசரித்தல்களை இன்று செய்யத்தான் வேண்டும் என்பது ஒரு கூற்று. கூடவே சில அவசியங்களை தேவைக்கதிகமாய் செய்யாமல் போகிறார்கள். ராகம் தானம் பல்லவியை பாடாதது போல.

(RTPஐ) அவாளே வேண்டாம்னுட்டா சார், அதுக்கு பதிலா துக்கடா செட் பாடிட சொல்லிட்டா என்று வித்வான்கள் கூறும் சால்ஜாப்பில் ஓரளவு உண்மையுமிருக்கிறது. சீசன் சமயத்தில் பல சபாக்களில், ராகம் தானம் பல்லவியை வித்வான் கச்சேரியின் அங்கமாய் விஸ்தாரமாய் பாடுவதற்கு, காரியதரிசிகள் முகம் சுளிக்கிறார்கள். வியாபார நேர விரயம் என்று.

ஆந்திராவில் பொதுவில் இப்படி இல்லையாம். இங்கு கச்சேரிகளில் நிச்சயம் பல்லவி பாடுகிறார்கள். ஒருவேளை டிசம்பர் சீசன் எனும் கமர்ஷியல் அளவுகோல் இல்லை என்பதாலா? இன்னொரு கூற்று ஆந்திராவில் கர்நாடக இசை கேட்கும் மக்கள் தமிழ்நாட்டைவிட கம்மி, ஆனால் சுத்தம்; சாஸ்திர இசை நீர்க்கடிக்கப்படுவதை விரும்புவதில்லையாம். பல்லவிகளும் இன்னமும் பிழைக்கிறது. சமீபகாலமாக நான் கேட்டுவரும் ஆந்திர பாடகர்கள் பந்துலராமா, மண்டா சுதாராணி, கர்நாடகா பாடகி எம்.எஸ்.ஷீலா, என்று அனைவரும், மேலேயுள்ள கூற்றை மெய்பிக்குமாறு, தங்கள் அனைத்து கச்சேரிகளிலும் பல்லவி பாடியிருக்கிறார்கள்.

தமிழ்நாட்டில் பல கச்சேரிகளில், கூட்டம் சேர (இல்லை அடுத்தமுறை வர) அநேகரை திருப்திபடுத்தவேண்டும். இதற்காக கடினமான விஷயங்களை சற்று ஒதுக்கி, இசையையே நீர்க்கச்செய்கிறோம். இதில் முதலில் அடிபடுவது RTPயே. ஒன்று மொத்தமாய் தூக்கிவிடுகிறோம். இல்லை இடக்கு ராகத்தில் சிறு பல்லவியாய் திஸ்ர தாளத்தில் 20 நிமிடத்திற்குள் சுருக்க முடித்துவிடுகிறோம். வேண்டாவெறுப்புடன் தீபாவளி மருந்து சாப்பிடுவது போல.

மேட்டிமைவாதம் என்று ஆந்திராவை சாடுவதா, எளியோர்க்கு எளியோனாய் RTPஐயே பெரும்பாலான கச்சேரிகளில் தூக்கிவிடும் தமிழ்நாட்டை பாடுவதா.

கலைஞன் தேய்ந்தால், ”சிந்து பைரவி” உட்பட, சில காரணங்களே. கலை தேய்ந்தால் சமுதாயம் மொத்தமும் பொறுப்பே.

1965இல் ஆலத்தூர் வெங்கடேச ஐயர் கலாநிதியாக கௌரவிக்கப்படுகையில் ஆனந்தவிகடனில் பல்லவி என்றாலே கேண்டீன் பக்கம் ஒதுங்கிவிடும் ரசிகர்களை, தன் பல்லவிகளால் சபைக்கு இழுத்தவர் என்றவிதமாய் சிலாகித்திருந்தனராம். பல்லவி பாடினால் கேட்கமாட்டார்கள் என்று ரசிகர்களை முட்டாளாக்குவது, உழைக்க நேரமின்றி, பொழைக்க சொல்லும் நொண்டிச்சாக்கு. தற்கால கர்நாடக இசையின் டாப் டென் மோசடிகளில் ஒன்று (மிச்ச மோசடிகளை பிறகு தனிக்கட்டுரையாக்குவோம்).

*****

கட்டுரை மொத்தமும் இவ்வகையில் அங்கலாய்த்து, குறைபட்டுக்கொள்ளும் விமர்சனமாய் எழுதப்போவதில்லை. நல்லதை பல தடவை சொல்லலாம். இணையத்தில் அநேகமாக தங்காது. நல்லதல்லாதவற்றை சொல்லாமல் விட்டுச்செல்வது உத்தமம். சொன்னாலும் சுருக்கமாக சொல்லி தாண்டிச்செல்வது மத்தியமம். இப்படி செய்தாலும், நீ அன்று அப்படி குறை சொன்னியே என்று நினைவூட்டிக்கொண்டிருப்பது அதமம். இணையத்தின் சாசுவதத்தில் அதமம் கோலோச்சியிருக்கிறது என்றாலும், நம்பிக்கை வைத்து நல்லதை மட்டும் அதிகம் சொல்லுவோம்.

போதும் குறை. இப்போது நிரை.

ராகம் தானம் பல்லவி என்றால் என்ன? அறிமுகதளத்தில் விளக்குவோம்.

ராகம் தானம் பல்லவி – சுருக்கமாக RTP – கச்சேரியின் பிரதான அங்கம். இது கீர்த்தனை, அதாவது பெரிய பாட்டு, இல்லை. சிறு பாட்டு வரிகள் மட்டும் உடையது. பெயருக்கேற்றவாறு RTPயில் முதலில் எடுத்துக்கொண்ட ராகத்தில் ஆலாபனை செய்யப்படும். ஒரு ராகமாகவோ, பல ராகங்களகவோ இருக்கலாம். ஆனால் அனைத்தையும் விஸ்தரித்து ஆலாபனை செய்யவேண்டும். பாடுபவரும், பக்கவாத்ய வயலின் வித்வானும் ஆலாபனை கூறுகளை ஓரிருமுறை பரிமாறிக்கொள்வர்.

பேராசிரியர் சாம்பமூர்த்தி தன் இசைப்புத்தகத்தில் (South Indian Music, Book IV) ஆக்‌ஷீப்திகா (அறிமுகம்), ராகவர்தினி (விவரிப்பு), ஸ்தாயி மற்றும் மகரினி (முடிவுரை) என்று பலவகை ஆலாபனை வழிமுறைகளை கூறி, RTPயில் ஆ லாபனை முக்கால் மணிநேரம் இருக்கலாம் என்கிறார். ஜி.என்.பி. காலத்தில் ஷண்முகப்பிரியா ராகத்தில் முக்கால் மணிநேரம் இருந்திருக்கிறது. இன்று இத்தெம்பு இள வித்வான்கள் பலரிடம் இல்லை. அப்படியே ஒரு 15 நிமிடம் உழைத்துப் பாடினாலும் ரசிகர்கள் சிலரிடமே ஒருமுகப்படுத்தி கேட்கும் தெம்பும் இருக்கிறது. தலை ஆடுவது நின்று, கால் ஆடி, பிறகு கை நடுங்கி, வாவ், ஃபுல் ஸெட் மா என்று எஸ்ஸெம்மெஸ்ஸிக்கொள்கிறார்கள். இல்லை தரஸ்தாயியில் ஆசுவாசிக்க பாடகர் சற்று மூச்சுபிடித்து நின்றால், அவசரமாய் கைதட்டி நடுக்கத்தை குறைத்துக்கொள்கிறார்கள்.

தஞ்சாவூர் எஸ் கலியாணராமன் நாட்டைகுறிஞ்சி ராகம் தொடக்கம் ஒலிக்கோப்பு.

மேலே ராகம் ஆலாபனை தொடக்கம். நீர் திரையிசை மட்டும் கேட்பவராயினும், ஆலாபனை முதலடி தொடங்கியதும் (இல்லை ஒரிருமுறை கேட்டதும்)  ஆ, இது கண்ணாமூச்சி ஏனடா (கண்டுகொண்டேன் கண்டுகொண்டேன்) மாதிரி இருக்கே என்று கண்டுகொண்டால், கர்நாடக இசைக்காதுகளை அமர்களமாய் பெற்றிருக்கிறீர்கள். அடுத்த சீசனில் ஒரு முழுக்கச்சேரியாவது தைரியமாய் கேட்கலாம். ரசிப்பீர்கள்.

இப்படி ராகத்தை சில பரிச்சயமான, ஆதாரமான, பிடிகள் (ஸ்வரக்கோர்வைகள்) வைத்து உடனே கண்டுகொள்ளுமாறு ஆலாபனை முதலில் அறிமுகம் செய்யவேண்டும். இதைத்தான் ஆக்‌ஷீப்திகா (அறிமுகம்) என்பதில் நியதியாக்கியுள்ளனர்.

போதும். அடுத்து தானம்.

தானம், ஆனந்தம் போன்ற சொற்களையும், அவ்வப்போது தானம்த, அனம்த, தானன்ன, தானம்ன என்ற சொற்களையும் வைத்துக்கொண்டு ராகத்தை விஸ்தரித்து பலவகை கால அளவிலும், கதியிலும் பாடுவார்கள். சஞ்சய் சுப்பிரமணியன் போன்றோர் இன்று சதானந்தம் போன்ற சொற்களையும் ஸ்வராக்‌ஷரமாக (ஸ  – தானந்தம்) சேர்கிறார்கள்.

பல வகை தானங்கள் இருக்கிறன. சாம்பமூர்த்தி மானவ, அஸ்வ, கஜ,, மயூர, மண்டூக என்று மிருகங்களின் பெயர்களுடைய தானங்களையும், சக்ர, வக்ர, மிஸ்ர, மாலிக, கம்பீர, வித்ய தானங்களையும் குறிப்பிடுகிறார். உதாரணமாய், சக்ர தானத்தில் வளையமாய் ஸ்வரங்களை கோர்த்து அதிவேகத்தில் தானம் செய்வதாம்.

பொதுவில் சௌககாலத்தில் ராகத்தை மெதுவாய் விஸ்தரித்து ஆலாபனை செய்திருக்கையில், மத்தியமகாலத்தில், அதாவது மிதவேகத்தில் தானம் செய்வது ஸொஸ்தமானது. தற்காலத்தில் வேதவல்லி இவ்வகை தானத்தில் கில்லாடி, இல்லை கில்லேடி.

எஸ்.பாலசந்தர் வீணையில் தானம் ஒலிக்கோப்பு

தானம் வீணையில் சுகிர்தமாய் சுநாதமாய் வரும். நாகஸ்வரம் சற்று தடுமாறும். மேலே ஒலிக்கோப்பில் எஸ்.பாலசந்தரின் காம்போஜி ராக மத்தியமகால (மிதவேகத்தில்) தானப் ப்ராபல்யத்தை கவனித்திருப்பீர்கள். இது தொடக்கமே. இப்படியே போய் வீணை வயலின் பொறிபறக்கும் தானக்கோர்வை பரிமாற்றங்களில், 15நிமிடம் கழித்து உச்சத்தில், மூச்சுவிட மறந்து, சீட்டின் நுனிக்கு வந்து எழுந்துவிடாமல் கெட்டியாய் பிடித்துக்கொண்டு…  யாராவது சத்தமாய் இருமுவார்.

இப்போதெல்லாம் செல்போன் அடிக்கிறது. எடுத்தும் பேசுகிறார்கள் (நா கச்சேரில இருக்கேண்டி…)

பெண்கள் ஒருகாலத்தில் தானம் செய்யாமல் அல்லது செய்யவிடப்படாமல் இருந்தார்கள். பிரபலமான பிருந்தா முக்தா போன்றோர் பெரிதாக தானம் பாடியதே இல்லை. இவர்கள் ஸ்வரகல்பனை செய்வதையே தவிர்த்தனர் என்றும் கூறுவர். ராகம் கீர்த்தனை, பதம் ஜாவளி என்று போய்விட்டனர். பெண்களுக்கு கணக்கு வழக்கு அறிவு கம்மி, இதெல்லாம் எதற்கு இவர்களுக்கு என்று ஒரு காலத்தில், கர்நாடகசங்கீதம் பாமரர்களுக்கு தேவையில்லை என்கிற மேட்டிமைவாதத்தின் நீட்சியாய் ஒரு உப முடக்குவாதம் பேசியிருக்கிறோம்.செயல்படுத்தியும் இருக்கிறோம்.

எனக்கு தெரிந்து இதை உடைத்து தானம் பாடலாம், பெண்களும் RTP செய்யலாம் என்று காட்டியவர் டி.கே. பட்டம்மாள். ஆனால் இவரால் அனைத்து RTP வகையராக்களுக்கும் முழுமையாக கைங்கர்யம் செய்யமுடியவில்லை என்றே கூறுவேன். பிறகு எம்.எல்.வசந்தகுமாரி, வேதவல்லி, சுகுனா புருஷோத்தமன் என்று பலர் ராகம் தானம் பல்லவியில் ஆதிக்க கொடி நட்டனர்.

இன்று தமிழ்நாட்டில் சௌம்யா, சுதா ரகுநாதன், வசுந்த்ரா ராஜகோபால் போன்றோர் நல்ல லய ஞானத்துடன், கையில் என்ன கடின தாள ம் வேண்டுமானலும் நிற்கும் என்று காட்டி, அரிதான ராகங்களிலும் சமயம் அமைகையில் RTP செய்கின்றனர். உதாரணமாய், 2009 அகதெமி கச்சேரியில் சௌமியா, வர்தனி என்கிற அரிதான  ராகத்தில் அருமையாக RTP செய்தார். ஆலாபனை ஒலித் துண்டுகளை கேட்டுப்பாருங்கள்.

சௌமியா வர்தனி ராகம் ஒலிக்கோப்பு.

இந்த சுட்டியில் இருக்கிறது; கட்டுரையில் கேட்குமாறு நுழைக்கவேண்டும்

ராகம், தானம், பிறகு பல்லவி. பொதுவாக இரண்டு வாக்கிய சாஹித்தியம் அல்லது பக்தி போன்ற ரஸங்கள் மிளிரும் சொற்கள். இதை முன்னர் ராகம் தானம் என்று விஸ்தரித்த ராகத்தில் மெட்டமைத்து, தாளம் அமைத்து பாடவேண்டும்.

பல்லவி என்றால் பதம் லயம் வின்யாசம் (ப-ல-வி) இவற்றின் கூட்டு என்பர்.பதம் என்றால் சாஹித்தியம் அல்லது பாட்டு வரிகள். லயம் என்றால் என்ன தாளம், கால இடைவெளிகளில் பாடுகிறோம் என்பது. வின்யாசம் என்றால், கற்பனைவளஞ்செரிய ராகத்தையும், லய கணக்குகளையும் இசையாய் வெளிக்காட்டுவது.

பல்லவிகள் பலவகை. திரப்படப்பாடல்களில் வரும் முதல் இரண்டு வரிகள் அனைத்தும் பல்லவிகளே. கீர்த்தனைகளிலும் இவ்வாறே. RTPக்காக பிரத்யேகமாக பல்லவிகளும் உண்டு. அதீத, அனாகத எடுப்பு பல்லவி, கோபுச்ச பல்லவி, ஷட்கால பல்லவி, ராகமாலிகை பல்லவி என்று பலவகையாக பார்க்கலாம்.

பிரபலமான சதுர் ராகமாலிகை பல்லவியை கூறி இக்கட்டுரையை முடிப்போம். சதுர் என்றால் நான்கு; நான்கு ராகங்களில் அமைந்த பல்லவி. சிறப்பு, ராகங்களின் பெயர்களையே சாஹித்தியமாக, பாட்டின் வார்த்தைகளாக பொருள்பட அமைந்துள்ள பல்லவி.

சங்கராபரணனை அழைத்தோடி வாடி கல்யாணி தர்பாருக்கு

எந்த நான்கு ராகங்களில் இதைப்பாடவேண்டும் என்று உங்களுக்கு புரிந்திருக்கும். இசைக்கலையின் சாஹித்திய கற்பனைத்திறனின் வெளிப்பாடு.

அரியக்குடியாரின் இப்பல்லவியை விடியோ வழியே ஆடியோவாக கேட்டுமகிழுங்கள். விரிவாக இதையே அடுத்த பகுதியில் பார்ப்போம்.

http://www.youtube.com/watch?v=lT9nD9C1gQc

பல்லவி பாடுகையில், இடையே நிரவல் (சாம்பமுர்த்தி, நிறவல் என்கிறார்), ஸ்வர கோர்வைகள், கணக்குகள், அனுலோமம், பிரதிலோமம் (இதைபற்றி விரிவாய் அடுத்த கட்டுரையில்) போன்ற ஸ்வர லய விற்பன ங்களை கடந்து ராகமாலிகா என்ற நிறைவு பகுதியில் முன்கூறிய பல்லவியை பல ராகங்களிலும் தாளத்திற்கேற்ப பாடி முடிக்கவேண்டும். பிறகு பக்க வாத்தியங்களின் தனி ஆவர்த்தனம், முடிவில் பல்லவியை மீண்டும் ஷட்காலத்திலும் (அமைந்திருந்தால், இல்லை த்ரிகாலத்தில்) பாடி நிறைவுசெய்யவேண்டும்.

ஒழுங்காய் விஸ்தாரமாய் செய்தால் RTP மட்டும் குறைந்தது ஒன்றரை மணிநேரம் ஆகும். தேர்ந்த இசைக்கலைஞர்களுக்கு ஆங்காங்கே உற்சாகம் கரைபுரண்டால் தேர்ந்த ரசிகர்கள் இருக்கும் சபையில் இரண்டு மணிநேரம் போவதே ஒருவருக்கும் ஸ்மரனிக்காது.

*****

கல்பகம் ஸ்வாமிநாதன்

Standard

ஓப்பெரா இசைமுறையில் தேர்ந்த பெண்குரலால் ஒரு ஸ்வரத்தை ஓங்கிப்பிடித்தே, தோன்றும் ஒலி அதிர்வுகளினால் அருகிலிருக்கும் கண்ணாடியை உடைக்கமுடியுமாம். மனித குரலுக்கு அவ்வளவு மகத்துவம். அதேபோல கர்நாடக இசை மற்றும் பொருள் நிரம்பிய வார்த்தைகளாலான அதன் கீர்த்தனைகளின் நுணுக்கங்களை சகல பரிமாணங்களுடன் அழகுடன் வெளிக்கொணரமுடிவதும் வாய்ப் பாட்டில்தான் என்பர். இசைக்கருவிகள் ஒரு மாத்து கீழேதான்.
Continue reading

ஷட்ஜம் சரி ஷட்ஜமம் தவறு

Standard

கர்நாடக சங்கீத விமர்சனம் ஒன்றில் இன்று ஷட்ஜமம் என்று படிக்க நேர்ந்தது. ஸ ரி க ம ப த நி ஸா ஸ்வரங்களில் ஸ வை குறிப்பிடுகையில் விமர்சகர் ஷட்ஜமம் என்கிறார். இது தவறு. ஷட்ஜம் என்பது சரியான சொல்.

ரி, க, ம, ப, த, நி ஆகிய மற்ற ஸ்வரங்களுக்கு முறையே ரிஷபம், காந்தாரம், மத்தியமம், பஞ்சமம், தைவதம், நிஷாதம் என்று கூறுவர். அதன்படி ஸ வை ஷட்ஜமம் என்று சொல்வது வழக்கத்தில் வருகிறது போலும்.

ஷட்ஜம் என்பதற்கு ஓரளவு அர்த்தம் இருக்கிறது. ஷட்ஷு ஜாயதே ஆகவே ஷட்ஜம் என்கிறார் எம்பார் விஜயராகவாச்சாரியார். ஷடாத்வாரங்களையும் சுத்தம்செய்து புறப்படும் ஒரு சப்தமே ஷட்ஜம்.
Continue reading

ஷட்விதமார்கினி ராகத்தில் ஞானமொஸகராதா

Standard

2009 டிசெம்பர் மியூசிக் சீசனில் கச்சேரி விமர்சனங்களை உடனுக்குடன் எழுதுவது என்று கங்கனம் கட்டிக்கொண்டு ஆங்கிலத்திலும் தமிழிலும் எழுதியதில் (இடையில் அறிவியல் மற்றும் கொளை கதை வேறு) ஓய்வு நேரம் மொத்தமும் செலவாகி, எழுதுவதற்கே பல மாதங்கள் மனத்தடை வந்துவிட்டது. இதில் நஷ்டம் உங்களுக்கு இங்கு குறிப்பிட்டிருக்க வேண்டிய நான் கேட்ட பல நல்ல கச்சேரிகளின் விமர்சனமும் அவைகளில் வந்த சில இசை நல்முத்துகளும்.

அப்படிப்பட்ட இசைமுத்துக்களில் ஒன்று நாதஇன்பத்தில் டிசெம்பர் 2009இல் வேதவல்லி கச்சேரியில் வந்தது.

வயதாகிவிட்டதால் அவரின் சாரீரத்தில் அவ்வப்போது ஏற்படும் ஆயாசங்களையும், தாள இடர்களையும் குறையாக சுட்டிக்காட்ட மனமில்லை. ஏனெனில் வேதவல்லியின் இசையை கேட்டவுடன், அவரின் ராக ஆலாபனையின் சாதகம்செறிந்த கம்பீரத்தையும், சூட்சுமங்களை வெளிக்கொணரும் நளினத்தையும் கேட்டவுடன், மற்றெதெல்லாம் மறந்துவிடுகிறது. அதுவும் ராகமாலிகா விருத்தங்களில் ஆலாபனையில் எந்த ஸ்வரத்தில் ஒரு ராகத்தில் இருந்து வழுக்கிக்கொண்டு, கண்மூடிய ரசிகர்கள் முகம் சுளிக்காமல், அடுத்த ராகத்திற்கு செல்வது என்பது அவருக்கு மட்டுமே தெரியும் சிதம்பர (ஸ்ரீரங்க?) ரகசியம். நான் கேட்டவரை இன்று கச்சேரி சர்கியூட்டில் ஒருவரும் இதை இவ்வளவு நேர்தியாக செய்வதில்லை.

இதோ அவரது தோடி ராக ஆலாபனை சிறு வீடியோ
Continue reading

மெட்ராஸ் மியூசிக் சீசன் 2009: நேதனூரி கிருஷ்ணமூர்த்தி கச்சேரி

Standard

நேதனூரி கிருஷ்ணமூர்த்திக்கு பின்பாட்டு அவர் சிஷ்யர்கள் மல்லாடி சகோதரர்கள், வயலினில் ஸ்ரீராம் பரசுராம், மிருதங்கம் திருச்சி சங்கரன், கஞ்சீராவில் பி.எஸ்.புருஷோத்தமன். இரண்டு என்றும் ஒளிரும் நட்சத்திரங்கள், இரண்டு ரைசிங் ஸ்டார்ஸ். அருமையான செட். கச்சேரி சிறப்படைய முதல் தேவை பூர்த்தி. மேல் ஸ்தாயிகளில் சற்று தடுமாறினாலும் கிருஷ்ணமூர்த்தியின் குரல் அவர் சொன்னதை கேட்டது. அவர் இசையை நம்மை கேட்கவைத்தது.

வனஜாக்‌ஷி என்று கல்யாணி வர்ணம் தொடக்கத்தில் இருந்து ’சுந்தரத்தெலுங்கு’ கச்சேரி அமர்க்களம். வர்ணத்திற்கு முன் குறைவாக நிறைவாக ஆலாபனை. வர்ணத்தின் சிட்டைஸ்வரங்களை ஒட்டி நி யில் முடியுமாறு கமபத பொதிந்த கல்யாணி ஜீவஸ்வரங்களை பன்ச் அடித்துக்கொண்டே வந்த ஆவர்தன ஸ்வரகல்பனை. பிரமிப்பில் வயலினில் வாங்கி வாசிக்க வேண்டிய ஸ்ரீராம் பரசுராம் சற்று திணறிவிட்டார். மேடையில் வித்வான்களிடையே ஜெனரேஷன் இடைவெளி வயதில்மட்டுமல்ல.
Continue reading

மெட்ராஸ் மியூசிக் சீசன் 2009: பரசாலா பொன்னம்மாள் கச்சேரி

Standard

இங்கு மாஸ் கன்சர்வேஷன் விதி வேலைசெய்யாதோ, இது மியூசிக் அகடமியில் நுழைகையில் அடிக்கடி வரும் சந்தேகம். வெளியே நிற்கும் கார்களைக்காட்டிலும் உள்ளே மக்கள் குறைவு. வித்வான் முக்கியமான மதுரங்களை நாம் சபையில் இல்லாதிருக்கையில் பாடிவிடுவாரோ என்று பதபதைத்து கான்டீனில் இட்லி-வடையை வேகமாக விழுங்குகையில் பொன்னம்மாள் கச்சேரியை தொடங்கிவிட்டார்.

ஹரிகேசநல்லூர் முத்தையா பாகவதரின் நேரடி சிஷ்யையான பொன்னம்மாளின் சங்கீதம் நாம் இழந்துவிட்ட ஒரு உல்லாசமான, மெதுவான நாட்களடங்கிய கடந்தகாலத்தை நினைவூட்டும். வித்தியாசம், புதுமை என்று தியாகராஜருக்கு பேஸ்பால் தொப்பி அணிவிக்கும் இந்நாளிலும் மீண்டும் ஒரு முறை அவரை பாட அழைத்ததற்கு மியூசிக் அகடெமியை பாராட்டவேண்டும்.
Continue reading

மெட்ராஸ் மியூசிக் சீசன் 2009: விஜய் சிவா கச்சேரி

Standard

விஜய் சிவா ராஹுல் டிராவிட் போல. மிஸ்டர் ரிளையபிள். என்று கேட்டாலும் கன்சிஸ்டென்ட்டாக ஒரு தரத்திற்கு மேல் கச்சேரி செய்வார். டோட்டல் பெயிலியர் என்று என்றும் கிடையாது. பாஸ் மார்க்கிற்கு மேல் எவ்வளவு என்பது அன்றைய தினத்தை பொறுத்தது.

சில பரிட்சைகளை எழுதுகையில் முதல் நாலைந்து கேள்விக்கு பதில் சட்டென்று கிடைத்து நொக்கிவிடுவோம். நிச்சயம் சென்டம்தான் என்று தலையை சிலுப்பிக்கொள்கையில், கடைசி இரண்டு மூன்று கேள்விகள் விடை தெரியாமல் தேங்கிவிடும். என்ன கர்ணம் போட்டாலும் சற்றென்று பதில் பிடிபடாது. மியூசிக் அகெதிமியில் அன்று நடந்தததில், கேதாரம், ஆனந்தபைரவி, கமனாஸ்ரமம், பைரவி என்று 60% கச்சேரி விஜய் சிவாவுடையது. சங்கரன்-சுரேஷ் தனி ஆவர்த்தனத்திற்கு பிறகு நாட்டைகுறிஞ்சி ராகம் தானம் பல்லவியில், ராகம் சரியாக பிடிபடாமல் கச்சேரி சுடு குறைந்தது. தனிவரை இருந்த கச்சேரி விறுவிறுப்பு அப்புறம் இல்லை.
Continue reading

ஜனரஞ்ஜனியா பூர்ணசந்திரிகாவா

Standard

ஒன்றுக்கொன்று ஸ்வர, லக்‌ஷண, ஜனக-ஜன்ய சம்பந்தம் உடைய இரண்டு ராகங்கள் கர்நாடக சங்கீதத்தில் அநேகம். இது இசையின் ஓசையின் குறையில்லை. இச்சங்கீதத்தினை வளர்த்த நம் முன்னோர்களின் நுனுக்கத்தின் நிறை. உதாரணமாக பூர்ணசந்திரிகா மற்றும் ஜனரஞ்சனியை எடுத்துக்கொள்வோம். இரண்டிற்கும் பல ஒற்றுமைகள். இன்றும் ஒன்றை பாடுகையில் ரசிகர்களுக்கு இன்னொன்றோ என்று தோன்றும்விதமாக பல கச்சேரிகளில் அமைந்துவிடும்.
Continue reading

மெட்ராஸ் மியூசிக் சீசன் 2009: வசுந்த்ரா ராஜகோபால் கச்சேரி

Standard

நல்லதை பல தடவை சொல்லலாம். இணையத்தில் அநேகமாக தங்காது. நல்லதல்லாதவற்றை சொல்லாமல் விட்டுச்செல்வது உத்தமம். சொன்னாலும் சுருக்கமாக சொல்லி தாண்டிச்செல்வது மத்தியமம். இப்படி செய்தாலும், அதையே ஞாபகம் வைத்துக்கொண்டு நீ அன்று அப்படி குறை சொன்னியே என்று நினைவூட்டிக்கொண்டிருப்பது அதமம். இணையத்தின் சாசுவதத்தில் அதமம் கோலோச்சியிருக்கிறது என்றாலும், நம்பிக்கை வைத்து மீண்டும் ஒருமுறை நல்லதை மட்டும் சொல்லுவோம். மைலாப்பூர் ஃபைன் ஆர்ட்ஸ் சபாவில் வசுந்த்ரா ராஜகோபால் கச்சேரியைப் பற்றி, சுருக்கமாக.
Continue reading

மெட்ராஸ் மியூசிக் சீசன் 2009: சஞ்சய் சுப்பிரமண்யன் கச்சேரி

Standard

நல்ல கூட்டம். முன்னரே சென்று டிக்கெட் வங்கி, கியூவில் காத்திருந்து, அன்ரிஸர்வ்டில் துண்டு போடாத குறையாய் உள்ளே சென்று அமர்ந்து, அப்படி இப்படி திரும்பி பின்னால் சிலோன் மாமி திருநெல்வேலினா அல்வா குடுப்பீங்களா என்று பக்கத்து மாமாவிடம் கதைப்பதை கேட்பதற்குள், நேரத்திற்கு கச்சேரியை தொடங்கிவிட்டார் சஞ்சய் சுப்பிரமண்யன்.

நிறைய கேட்டுவிட்டோமே என்று, சஞ்சையை வேண்டுமென்றே சரியாய் ஒரு வருடம் கழித்து கேட்கிறேன். ஹிந்தோளவஸந்தம், கேதாரம், மணிரங்கு, பூர்விகல்யாணி, தோடி (மெயின் இல்லை), நாட்டைக்குறிஞ்சி… ராக செலக்‌ஷன், வந்தே மாதரம் என்போம் (கேதாரத்தில்), யார் போய் சொல்வார் (தோடி) ஸ்பஷ்டமான உச்சரிப்புடன் தமிழ் பாடல்கள், சஞ்சயிடம் எப்போதும்போல் வித்தியாசமான, சுவைக்கும் கலவை.

ஆனால் ஆயாசம் தெரிகிறது. வருடமொத்தமும் உலகளவில் சுழன்று செய்யும் கச்சேரி நிர்பந்தங்களில் சிக்கி தேய்வழக்காகிவிடுவாரோ என்று மனதை தடுமாறவைக்கிறது. என்னைப்பொறுத்தவரையில் மணிரங்குவைத்தை தவிர எதுவும் ஒட்டவில்லை (நாட்டைக்குறிஞ்சி நான் கேட்கவில்லை, கீழே பார்க்க).
Continue reading

மெட்ராஸ் மியூசிக் சீசன் 2009: ரவிக்கிரன் கச்சேரி

Standard

கேட்ட கச்சேரிகளின் தாக்கங்களை சேர்த்துவைத்துக்கொண்டு மொத்தமாக பெரிய கட்டுரை எழுத எத்தனித்து போன வருடம் விழிபிதுங்கியது போல் இல்லாமல், இந்தமுறை அன்று கேட்டதை, ரசித்ததை (ரசிக்காததையும்) அன்றே சொல்லிவிடுவது என்று விஞ்ஞாபனம். என்ன சொல்ல இருக்கும் மேட்டர் சுருக்கமாக முடிந்துவிடும். போகட்டும், காலத்திற்கேற்ப கச்சேரிகளே இரண்டு மணிநேரங்களாக சுருங்கிவிட்டன. பற்றி எழுதும் கருத்துக்களும் அவ்வாறே ஆகட்டும்.

எனக்கு ரவிக்கிரனின் இசையை பிடிக்கும். நமக்கு கை, கால் என்பது போல ரவிக்கிரனுக்கு கை, கால், கோட்டுவாத்தியம்… வாத்தியமும் ஒரு அபண்டேஜ். அவர் உடலின் நீட்சி. சுருக்கமான சங்கதிகளில், இரண்டு மூன்று இழுப்பில் கோட்டுவாத்தியத்தில் எந்த ராகத்தையும் சொரூபம் மாறாமல், அநேகமாக சாஸ்திரம் பிசகாமல், கொண்டுவந்துவிடுவார். மனது வைத்தால் இப்படி செய்யும் இன்னொரு வித்தகர் ஸ்ரீனிவாஸ். மாண்டலினை அபண்டேஜாக கொண்டவர்.
Continue reading

2008 சங்கீத சீசனின் பெஸ்ட் – என் பட்டியல்

Standard

மெட்ராஸ் மியூசிக் சீசன் என்பது ஒரு மாதத்திற்கும் மேல் நடக்கும் விஷயம். இதை எழுதுகையில் முடிவை நோக்கி நிறைய தொண்டை செருமல்களுடன் இன்னமும் நடந்து கொண்டிருக்கிறது. பத்து பதினைந்து சபாக்கள் நாளைக்கு ஐந்து கச்சேரி விதம், பத்திலிருந்து இருபது நாள் வரை கூடி சென்னையின் பல இடங்களில் நடத்துகையில் சீசனில் மொத்தம் ஆயிரம் கச்சேரிகளுக்கு மேல் நடந்திருக்கும். அவற்றில் நான் கேட்டது முப்பத்தியைந்து; மொத்தத்தில் ஐந்து சதவீதத்திற்கும் குறைவான சொற்பமே. என் சிறிய இசை காதுகளை நம்பி நான் தரவிருக்கும் அவற்றில் ஒரு பெஸ்ட் பட்டியல், சத்தியம் சாப்ட்வேரின் லாப கணக்கைவிட நிச்சயம் துல்லியமாக இருக்காது. ஒரளவிற்கு அனுமானிக்கக்கூடியதாக இருக்கலாம். மாத்யூ ஹைடனின் ஓய்வை போல.

நான் கேட்டவையிலிருந்து இதோ ஒரு பெஸ்ட் பட்டியல்.

Continue reading

வசுந்த்ரா ராஜகோபால் கச்சேரிகள்

Standard

அவரது பூர்வீகம் ஸ்ரீரங்கமாக இருந்தாலும், இரண்டு வருடம் முன்பு மியூசிக் அகதெமியில் அவர் செய்த ஹுசேனி ஆலாபனையே எனக்கு வசுந்த்ரா ராஜகோபாலின் இசையின் மீது உடனடியாக மரியாதையை வரவழைத்தது. நிரந்தரமாக.

தேன்குழல் போலக் கரைகின்ற குரல், ஜிகினாத்தனம் இல்லாத பாரம்பர்ய இசை, கிருதிகளில் சொல் தெளிவு, ஆரவாரமில்லாத அழகிய நிரவல், மாங்காய் ஊறுகாய் போலத் தேவையான அளவு நறுக்கெனக் கணக்கு வழக்குகள் சேர்த்து மனோதர்மத்துடன் வரும் ஸ்வரப்ரஸ்தாரங்கள், வழுவற்ற விறுவிறுப்பு, வீணற்ற வகைகள், வசுந்த்ராவின் கச்சேரிகள் ஒரு அருமையான சங்கீத அனுபவம்.

சாருகேசி, மந்தாரி, ஹுசேனி, தேவகாந்தாரி, சாமா, சுத்தசாவேரி, வாசஸ்பதி என்று தற்காலக் கச்சேரி மூட்டைகளில் அடைபாடாத ராகங்களில் நன்றாக பிரஸ்தாபிக்கப்பட்ட ஆலாபனைகள், அருணாசல கவியின் ராமநாடகத்தில் இருந்தும், திவ்யபிரபந்த பாசுரங்களிலிருந்தும் சுயமாக இசையமைக்கப்பட்ட உருப்படிகள் என்று அவர் கச்சேரிகள் உத்திரவாதமாக வித்தியாசமாக இருக்கும். ஆனால் கர்நாடக இசை அடிப்படைகளில் இருந்து வழுவாத வித்தியாசங்கள்.

இருபது வருடங்களுக்கு மேல் அவர் கனடாவில் இருந்துவிட்டு 1995வாக்கிலேயே சென்னை திரும்பவந்ததை இதற்கு முக்கியமான காரணமாக என்னால் கருத முடிகிறது. மைலை கர்நாடக இசை மஃபியாவின் தாக்கத்திலிருந்தும் விளையும் தேக்கத்திலிருந்தும் இசையைக் காப்பாற்றிகொள்ள வளரும் காலங்களில் அவ்விடத்தில் இல்லாமல் இருப்பது ஒரு சிறந்த வழி.

மற்றொரு வழி விமர்சனங்களுக்கு ரொம்பவும் அலட்டிக்கொள்ளாமல், தன் திறமையின் மீது கலையாத நம்பிக்கை வைத்து அடாவடியாக தான் செய்வதையே செய்து ஸ்தாபித்துக் கொள்வது. சஞ்சய் சுப்பிரமனியன், டி.எம்.கிருஷ்ணா செய்வதுபோல.

மணிரங்கு என்று ஒரு ராகம். சில பல வருடங்கள் முன்னர் கச்சேரிகளில் ப்ரதானமாக முழங்கிய விஷயம். சரியாகக் கற்று ஆலாபனையில் கரையேற்றாவிட்டால் மத்தியமாவதி போலவும் ஸ்ரீ போலவும் கேட்டு, கெட்டுத் தொலைக்கும். ஆலத்தூர் சகோதரர்கள் அருமையாக பாடுவார்கள். சங்கீதபிரியாவில் தேடிப்பார்த்தால் சில ஒலிக்கோப்புகள் கிடைக்கும். இந்த இசை சீசனின் தொடக்கத்தில் குறைபட்டுக்கொண்டிருந்தேன், எங்கு போயிற்று இந்த ராகமெல்லாம் என்று. இப்படியே பேசிப் பேசி நிகழை இகழ்ந்தும் பழையதைப் புகழ்ந்தும், பிறந்தேயிராத அந்த நாளும் வந்திடாதோ என்று ஏங்கி அங்கலாய்ப்பது அடியேன் குணம்.

டிசம்பர் 16 நாரத காண சபாவில் நடந்த மத்தியான கச்சேரியில் வசுந்த்ரா முக்கிய உருப்படியாக பாடியது மணிரங்கு. ஆஹா.

கீர்த்தனை என்னையும் வரச்சொன்னாரோ ரகுநாயகா. ராமநாடகத்தில் இருந்து விபீஷணன் அனுமனிடம் கேட்பதுபோல இருக்கும் கட்டத்தில் இருந்து வசுந்த்ரா அரியக்குடியாரோ KVNனோ இசைவடிவப்படுத்தி, வசுந்த்ரா பாடியது. (சென்னை வெங்கட்நாராயணா ரோடில் உள்ள) திருப்பதி தேவஸ்தானத்திலும் மற்ற இடங்களிலும் ஏற்கனவே அவர் பாடியதுதான். மணிரங்கு ஆலாபனை அருமையாக இருந்தது. ஆனால் பாலமுரளிகிருஷ்ணா நிதானமாகப் பாடும் மாமவ பட்டாபி ராம போல இல்லாமல் கீர்த்தனை மணிரங்குவின் அமைதியான அழகை ரசிக்கமுடியாத துரிதகதி காலபிரமாணத்தில் இருந்ததாக எனக்குத் தோன்றியது. இருந்தாலும் மணிரங்கு கேட்கக்கிடைத்தது மகிழ்ச்சியே.

வர்ணத்திற்கு பதிலாக கௌளையில் தீக்‌ஷதரின் ஊத்துக்காடு வெங்கடசுப்பையரின் சேனாபதே, தியாகராஜரின் தெலியலேரு ராமா தேனுகாவில் ஸ்வரப்பிரஸ்தாரம் போன்றவை அக்கச்சேரியின் மற்ற சிறப்புகள். ஆனால் வசுந்த்ரா அன்று பாடிய வராளி ஆலாபனையை இரவு அகதெமியில் விஜய் சிவா தனது ஆலாபனையால் விஞ்சிவிட்டார். வசுந்த்ராவின் குரலுக்குப் பக்கவாத்தியமாக முகர்சிங் அவ்வளவு பொருத்தமாக இல்லை. சியாமா சாஸ்திரியின் சிந்தாமணி ராகக் கிருதி தேவி ப்ரோவ சமயமிதேவை அவர் அழுத்தமாகப் பாடுகையில் இந்தக் குரல்-முகர்சிங் உபாதை நன்றாகவே வெளிப்பட்டது.

ராகம் தானம் பல்லவி – சுருக்கமாக RTP – கச்சேரியின் பிரதான அங்கம். பெயருக்கேற்றவாறு இதில் முதலில் எடுத்துக்கொண்ட ராகத்தில் ஆலாபனை செய்யப்படும். அடுத்து தானம், ஆனந்தம் போன்ற வார்த்தைகளை வைத்துக்கொண்டு ராகத்தை விஸ்தரித்து பலவகை மீட்டர்களிலும் கதியிலும் பாடுவார்கள். பிறகு ஒரு பல்லவி. இதை ராகத்தில் மெட்டமைத்து, தாளம் அமைத்து பாடவேண்டும். இடையே நிரவல், ஸ்வர கோர்வைகள், கணக்குகள், அனுலோமம், பிரதிலோமம் (இதைபற்றி முன்னர் எழுதியுள்ளேன்) போன்ற ஸ்வர லய விற்பனங்களைக் கடந்து ராகமாலிகா என்ற நிறைவு பகுதியில் முன்கூறிய பல்லவியை பல ராகங்களிலும் தாளத்திற்கேற்பப் பாடி முடிக்கவேண்டும்.

வசுந்த்ரா திவ்யபிரபந்தப் பாசுரங்களையே RTPயின் பல்லவிகளாக எடுத்துக்கொள்கிறார். ஒரு பாசுரத்தின் முதல் இரண்டு மூன்று வரிகளைப் பல்லவியாகவும், பாசுரத்தின் நீளத்திற்கேற்ப, மிச்சமுள்ள வரிகளையோ அல்லது அவ்வாழ்வார் எழுதிய வேறு பாசுரங்களையோ ராகமாலிகையின் போது ஒவ்வொரு ராகத்தின் முடிவில் (புதுப்) பல்லவியாகவும் பாடுகிறார். அவரது நாரதகாண சபா கச்சேரியில் இவ்வகையில் மார்கழித்திங்கள் என்று தொடங்கும் திருப்பாவையை RTPயின் பல்லவிகளாக மாற்றிப் பாடினார். மெயின் ராகம் சுத்தசாவேரி. ராகமாலிகாவில் மதுவந்தி, கானடா, சுத்ததன்யாசி. திருப்பாவையை RTPயாகக் கேட்பது புதுமை. இவ்விடத்தில் கேட்டுமுடித்ததும் கரகோஷம் விண்ணைப் பிளந்தது என்று தேய்வழக்காக எழுத ஆசை. எழுதிவிட்டேன். நிஜத்தை மறுத்து.

டி. வி. சங்கரநாராயணனுக்கு குரல் சரியில்லை என்று அவசரகாலப் பாட்டாக டிசம்பர் 30 நடந்த அவரது மியூசிக் அகதெமி கச்சேரியிலும் RTPயில் மேற்கூறிய வடிவத்தை எதிர்பார்த்தேன். அன்று மெயின் ராகம் சாவேரி. ராகமாலிகையில் வலஜி, கானடா, ரேவதி. பல்லவியாக வந்தது திருப்பல்லாண்டு. (பல்லாண்டு, பல்லாண்டு, பல்லாயிரத்தாண்டு என்று சாவேரியில்…)

ஹுசேனியில் தியாகராஜரின் ராமா நின்னே நம்மிநானுரா வும், அடானாவில் அனுபமகுணாம்புதியும் (கச்சேரியில் கேட்டு எத்தனை வருடங்கள் ஆகிறது) அகதெமி கச்சேரியில் வந்த அருமையான உருப்படிகள். பின்னல் சங்கதிகளுடன் வந்த ஹுசேனி கிருதி அருமை. அரியக்குடியின் கச்சேரிகளையும், ஆலிந்தியா ரேடியோவில் எப்போதோ வந்த புதுக்கோடு கிருஷ்ணமூர்த்தியின் ஹுசேனியையும் நினைவில். விளைவு, ஹுசேனி ராகத்தை சப்மெயினாக எடுத்து ஆலாபனையும் செய்திருக்கலாமே என்று மனம் குறைபட்டது.

ஆனால், சப்மெயினாகச் செய்யப்பட்ட வாசஸ்பதி ஆலாபனை நன்றாகவே இருந்தது. கிருதி என்னாதுனி க்ருபகல்குணா.

மெயின் உருப்படி தோடி. காதுகளில் விழுந்தாலும், மனம் கேட்கவில்லை. ஒரு மாதமாகப் பல கச்சேரிகள் கேட்டு சீசன் முடிவில் தோடி போன்ற ராகங்களுக்குக் காதும் மனமும் தானாக மூடிக்கொண்டு விடும். எப்படி அருமையாகப் பாடினாலும். ஒரே நாளில் நாலைந்து கச்சேரிகள் என்று ஒரு மாதம் சென்னை சபாக்களைச் சுற்றும் இசை சீசன் சுற்றுப்பயணிகள் என்னுடன் அனுதாபிப்பார்கள்.

இதைப்போல இச்சீசனில் பத்து தடவைக்கு பிறகு தானாக என் காது மூடிக்கொண்ட மற்றொரு ராகம் பூர்விகல்யாணி.

பலவருடங்களாக ஆழ்வார் பாசுரங்களை சுலோக சந்தத்திலேயே கேட்டுப் பழகியிருந்த எனக்கு (ஸ்ரீரங்கம் கோயிலில் கேட்கையில் சங்கத்தமிழ் புரியாவிட்டாலும் இந்தச் சந்தத்திற்கே ஒருவித தெய்வீக உட்கிளர்ச்சியைத் தூண்டும் சக்தி உண்டு என்பததை அறிய முடியும்), RTP போன்ற கர்நாடக இசை வடிவத்தில் அவற்றைக் கேட்பது வரவேற்கத்தக்க வித்தியாசமாகவே இருந்தது. உடனடியாக ஞாபகம் வருவது இளையராஜாவின் மேற்கத்திய ஓப்பரா போன்ற இசைவடிவம் கொடுக்கப்பட்ட திருவாசகம் முயற்சி. இவ்வகை முயற்சிகள் உடனடியாகப் பலரின் ரசனை அங்கீகாரத்திற்கு உட்படுவதில்லை. ஓதுவாரின் வாயில் கேட்ட திருவாசகத்தையும், அரையர் சேவையில் கேட்டுப் பழகிய பிரபந்தத்தையும் பழக்கமற்ற வேறு இசைவடிவத்தில் நம்மில் பலருக்குக் கேட்க முடிவதில்லை. கட்டாயமாக மாற்றிக்கொள்ளத் தேவையில்லை என்பதால், மனதுமில்லை. கேட்கவேப் பொறுமையுமில்லை.

ஆனால் வரையரைகளை விரிக்க வல்ல இவ்வகை இசை முயற்சிகள் – அவ்வப்போது சொதப்பினாலும் – நிச்சயம் தேவை. காட்டாறு போல வேண்டாம் என்றாலும் சிற்றாறு போலவாவது கலை இசை வடிவங்கள் ஓடிக்கொண்டிருக்க வேண்டும். அப்போதுதான் வளர்ச்சி. இல்லையெனில் தேத்தாங்குட்டையாகிவிடும்.

பல வருடங்கள் முன்பு நன்றாக இருக்கிறது என்று சொன்னார்கள் என்று அதே தோடி ராக ஆலாபனையையும் கீர்த்தனையயும் வரிசையாக மூன்று சபாக்களில் மெயின் உருப்படியாகப் பாடுவது (அடுத்த இரண்டு சபாவில் சப் மெயினாக), கற்பனைத் திறன் வெளிப்பாடு என்று நெட்ருபோட்ட பஞ்சரத்ன ஸ்வரகோர்வைகளை வைத்து ஒப்பேற்றுவது, கற்பனை ஓடாவிட்டால் மேல் ஸ்தாயியில் சுருதி சேர்த்துச் சற்று நேரம் நின்று விட்டுக் கைத்தட்டல் எதிர்பார்ப்பது (நிச்சயம் கிடைக்கும் — கல்கி காலந்தொட்டே இவ்வாறுதானே), தமிழில் பாடுகிறேன் என்று (மடிக்கணினியில்) எழுதிவைத்துக் கச்சேரியில் படிப்பது, தொட்டதிற்கெல்லாம் கண்ணை மூடிக்கொண்டு கையை தூக்கி மோதிரம் மூடிய விரல்களைப் பல கோணங்களில் ரசிகர்களிடம் காட்டி இசைக் கச்சேரியில் அபிநயம் பிடிப்பது, விறுவிறுப்பு சுறுசுறுப்பு என்று தன் காதைத் தன் கையாலேயே மூடிக்கொண்டு தொண்டைக் கிழியக் கதறுவது போன்ற கர்நாடக இசைக் கச்சேரி வன்முறைகளை வசுந்த்ரா செய்வதில்லை.

நிச்சயம் அதிகப் பிரபலம் ஆகமாட்டார். கச்சேரியில் மேம்போக்குக் கூட்டம் சேராது.

நாலாயிரமும் நாமும் என்று அவர் பார்தசாரதி சுவாமி சபாவில் டிசம்பர் 28 காலை நடத்திய சொற்பொழிவு கலந்த இசை கச்சேரியில் கூட்டம் இருந்தது. ஆனால் இதற்கு காரணம் உடன் சொற்பொழிவு செய்த (பொதிகை டீவீ புகழ்?) வேளுக்குடி கிருஷ்ணனோ என்று நினைக்கத்தோன்றியது. ஏனெனில் டிசம்பர் 30 அன்று அகதெமியில் அவரது மெயின் கச்சேரியில் 28 பேர்களே இருந்தார்கள் (வாயில்காப்போன், பேருருளிகாப்போன் சேர்த்து).

வைரக்கடையில் கூட்டம் எதற்கு?

வஸந்தாவில் ட்விங்கில் ட்விங்கில்

Standard

இதை கேட்கையில் பல வருடம் முன்ப்பு கமல்ஹாஸன் டி.வி. பேட்டி ஒன்றில் பாலும் பழமும் கைகளில் ஏந்தி என்ற பாடல் வரியை மட்டும் முழு டியூனுக்கும் பாடிக்காட்டியது நினைவிற்கு வருகிறது.

(சுட்டி)

முதல் ராகம் வஸந்தா. இரண்டாவது, கேதார கௌளை. (மலையாளத்து சாயலில் உள்ள) மூன்றாவது சட்டென்று பிடிபட மறுக்கிறது.

பாடுபவர் ரேவதி ஷங்கரன்; சிறிது காலமே எடிட்டராக இருந்தாலும், மங்கையர் மலரின் உள்ளடக்கத்தையும், (அதன் மூலம்) பெண்களின் சுயகவுரவத்தையும் உயர்த்தியவர். இப்போது அது மீண்டும் புளிக்காய்ச்சல் செய்வது எப்படி போன்ற விஷயங்களை அலச ஆரம்பித்துவிட்டது.

நாகஸ்வரத்தில் நீலமணி

Standard

நாகஸ்வரத்தில் நீலமணி ராகம் கேட்டிருக்கிறீர்களா. இரண்டு வருடம் முன்பு மைலை கேசவ பெருமாள் கோயிலில், வாத்தியம் வாசிப்பவரின் சம்மதத்துடன், நான் செய்த ஒரு சிறிய ரெகார்டிங்கை கேட்டுப்பாருங்கள்:

[audio:http://www.nonoscience.info/wp-content/uploads/adyarbal_02_neelamani.mp3%5D

அதே வாத்தியத்தில், இன்னொரு சிறிய காபி ராகம் ஆலாபனை:

[audio:http://www.nonoscience.info/wp-content/uploads/adyarbal_01_kaapi.mp3%5D

சம்பந்தப்பட்ட அனுபவத்தை சௌம்யா கச்சேரியும் நீலமணி ஆலாபனையும் என்ற கட்டுரையில் எழுதியுள்ளேன்.

சௌம்யா கச்சேரியும் நீலமணி ஆலாபனையும்

Standard

பஸ் பிடித்து பாரதீய வித்தியா பவனத்தை அடைகையில் உட்கார இடம் கிடைக்காதோ என்று மனதினுள் பதற்றம். அரங்கினுள் மெயின் கதவு வழியாக நுழையாமல் வலதுபுறம் திரும்பி ஸ்டேஜின் பக்கவாயில் வழியாக ஃபீட்பேக் ஸ்பீக்கர் இருக்கும் பகுதியில் கீழே உட்காரலாம் என்று நுழைந்தால் ஆச்சரியம். வழக்கமாக சௌம்யா கச்சேரிக்கு பவனத்தில் இருக்கும் கூட்டம் இன்று இல்லை.திரும்பி மெயின் கதவு வழியாக அரங்கினுள் நுழைந்து இடம் பார்த்து முன்வரிசையில் அமர்கையில் வீணை குப்பையரின் ராகமாலிகை வர்ணமான வலஜி வச்சியை ஆரம்பித்து இருந்தார். பக்கத்தில் பக்கல ராமதாஸ் பாடகி விட்ட இடங்களை கவனமாக பூர்த்திசெய்து பொறுப்பாக தொடர்ந்தார். தெரிந்த வர்ணம் போலும்.
Continue reading

மணக்கவைத்த மணக்கால்

Standard

கர்நாடிகாவும் ஸ்ருதி பத்திரிகையும் சேர்ந்து நடத்தும் “சமர்ப்பணம்” இசை விழா எல்டாம்ஸ் ரோடில் உள்ள தத்வலோகா அரங்கில் (கல்யாண மண்டபம்?) பெருத்த ஆரவாரம் ஏதுமின்றி மிகுந்த ஏஸி குளிரில் இன்று துவங்கியது.

சமர்ப்பணம் இசை விழாவின் சிறப்பு இன்றைய முப்பது நாளில் முப்பத்தேழுகச்சேரி அவசர கதி இசை சீசனால் ஒதுக்கப்பட்டுவிட்ட ஆனால் அதனால் தங்கள் கலையில் சற்றும் ஒடுக்கமில்லாத ஒரு சில சங்கீத மேதைகளின் இசையை மீண்டும் ரசிகர்களின் மத்தியில் முழங்கவிட்டிருப்பது. என்னைப்போன்ற அரை நிஜாரில் காரில் உலவி செருப்புடன் ஏஸி ஆடிட்டோரியம் செல்பவர்கள் mp3யில் மட்டும் கேட்டுக்கொண்டிருந்த மணக்கால் ரெங்கராஜனின், எழுவதிற்குமேல் சென்றுவிட்டாலும் வயது சற்றும் தெரியாத உயிர்துடிப்பான இசையை, பிருகாவும் சதையுமாக கேட்கப்பெற்றது கர்நாடிகாவின் ராமநாதன் சௌம்யா மற்றும் சசிகிரனின் புண்ணியம்.

ஹம்சத்வனியில்சிறு ராக ஆலாபனைக்குப் பிறகு வந்ததுகருணை செய்வாய் கஜராஜ முகா; பாபனாசம் சிவனின் பாடல் என்று ராமதாஸ முத்திரையில் இருந்துகண்டுகொள்ளமுடிந்தது. பின்வந்த ஸ்வரங்களும் தீர்மானமும் வரப்போகும்பொக்கிஷங்களுக்கு முன்னுதாரணமாக அமைந்தது.

ரீதிகௌளைஆலாபனை ரெங்கராஜனின் பேஸ் (bass) குரலின் மகத்துவத்தைஉணர்த்தியது. ஒருசில அபாரமான பிடிகளுடன் ஆனந்தபைரவியெல்லாம் துளியும்எட்டிப்பார்க்காத அழகான ஆலாபனை. சௌம்யா உட்பட எல்லோரிடமும் உடனே அப்ளாஸ்வாங்கியது. ஸ்வாதித்திருநாளின்பரிபாலயமாம்கீர்த்தனைக்குப்பின் சப்மெயினாகமோஹனகல்யாணிஆலாபனை துவங்கியது.

பாடகருக்கு அநாயாஸமாக வந்த ராக பிடிகளும் விரித்துரைப்பதற்கானஐடியாக்களும் பிடில்வித்துவானுக்கு இன்று இந்த ராகத்தில் வரவில்லைஎன்றுதான் சொல்லவேண்டும். சுருக்கமாக in search of the melody. அதனால்நிதிசால சுகமாவிலிருந்து (கல்யாணி) சேவே ஸ்ரீகாந்தம் வரை இருக்கும்மெலடியை எல்லாம் அழகாக வாசித்தார். நன்றாகவே இருந்தது.சிவம் விஷபாருண்டம்என்று கண்டசாபுவில் முத்தையாபாகவதர் கீர்த்தனை நான் கேட்டிராதது.கண்டசாபுவை கண்டு அஞ்சாத, ‘கண்டகதியில் குதிக்காத, கணக்கான நிரவல்.சாமவேதப்ரியம் என்று தொடங்கி சங்கீத சரமாக வந்தது. ராமபத்திரனின் கணகணகாலப்பிரமாணத்தில் கலகலவென்று கிளர்ந்தது. சிறுவயதில் இந்த சிம்மம் எப்படிமுழங்கியிருக்கும் என்று நம்மை சிலாகிக்கச் செய்தது. நிரவலில் நிழல்போல்தொடர்ந்த சந்திரசேகரன் பிறகு வாழ்த்திப்பேசுகையில் “சிறு வயதில் பொறிபறக்கும்” என்று எனக்கு பதிலளிப்பதுபோல் நினைவுகூர்ந்த்தார்.

அடுத்து வந்தது ஆரபியா என்று என் போன்ற கத்துகுட்டிகள் இன்றும் குழம்பும்தேவகாந்தாரிஆலாபனை. எதுவாக இருந்தால் என்ன இரண்டையுமே இப்போது சீசனில் வேறு இடத்தில் கேட்கமுடியுமா என்பது சந்தேகமே. கீர்த்தனைக்ஷீரஸாகரஸயனா. பாடியவிதம் வெகு அபாரம். பழைய நாட்களில் ஒரு கீர்த்தனையை ஏன் பலவருடகங்கள் பாடி பயின்ற பிறகே மேடையேற்றி இருக்கிறார்கள் என்று நிதர்ஸனமாகபுரிந்தது. பத்து மணிநேரத்தில் ஃபாஸ்ட் ஃபுட் பாட்டாக கீர்த்தனைகளைகத்திக்கொண்டு மேடையேருபவர்களும் கவனிப்பார்களாக.

இத்தனை சுகமாக சயனித்தபிறகு மனசு இனி எதை கேட்க முடியும் என்று எண்ணிக்கொண்டிருக்கையில் வந்தது ஒரு googly. ரகுவம்சசுதாம்புதிஎன்றுகதனகுதூஹலமாக. சற்று வேகமாக துவங்கியது மிதவேகம் பிடித்து ப்ருஹாக்களை அள்ளிவீசிக்கொண்டு பயணித்தது. ராமபத்திரனா கொக்கா. அருமையாக அனுமானித்தார்ப்ருஹாக்களை. எனினும் அடக்கியே வாசித்தார். பிறகு வாழ்த்திப்பேசுகையில்அறுபதுகளில் பயந்தது போலவே இன்றும் பயந்தே, பிரமித்தே, வாசித்தேன்பாடகரின் இந்த கீர்த்தனைக்கு என்றார். கேரளாவில் பாடகருடன் 1960ல் கச்சேரிசெய்த அனுபவங்களை நினைவுகூர்ந்த்தார்.

விட்டாரா மணக்கால். அடுத்து வந்ததுகுந்தலவராளிஆலாபனை. சந்திரசேகரன் அருமையாக சற்றே காவடிச்சிந்து பாணியில் பிடிலில் பதிலளித்தார்.சரசரசமரேஎன்றுஉற்சாகமாக விரட்டினார் எழுவதைத்தாண்டிய இளைஞர். நடுவில் ஆதியில் த்ரிஸ்ரநடையில் சிட்டை ஸ்வரம் வேறு. ஸ ஸ மா ம ஸ என்று இழுக்கையில் ராமரின்கோதண்டம் சமருக்கு நாணேருவது ஒலியில் கேட்டது. கண்முன் வந்தது.

அடுத்து வந்தது ரெங்கராஜனின் மாஸ்டர்பீஸ்.காம்போதி. மெயின் உருப்படி.

ஆலாபனை ஆரம்பித்ததுமே கண்டுபிடித்துவிடலாம். ஒவ்வொரு ஸஞ்சாரமும்விஸ்தாரமாக நீட்டி முழக்கி நுணுக்கமான பிடிகளுடன் வரும். ஸ ரி க, ரி க ம, என்று வார்த்தை வார்த்தையாக பிய்த்துப் பாடாமல், முழு வாக்கியமாக பாடுவது.மைக் இல்லாத நன்மைக்காலத்தின் பாடும் முறை. ரெங்கராஜனின் காம்போதியிலும் தெரிந்தமுறை.

சற்று காதை மூடிக்கொண்டு கேட்டால் மைக்கில் கேட்க்காத குரலின்ரம்மியமும் ஒரு சில சூக்ஷமங்களும் கேட்டது. அடுத்தமுறை கச்சேரியில் ட்ரைபண்ணுங்கள். வெறும் கணக்குகளாக இல்லாமல் எல்லா ராக ஆலாபனைஐடியாக்களுக்கும் வாக்கியத்தின் முடிவில் அழகாக ஒரு முத்தாய்ப்புவைக்கிறார் பாடகர். மனதினுள் ஒரு கண்டின்யூட்டி இருக்கிறது இவ்வகை இசையைகேட்கையில்.

சந்திரசேகரன் காம்போதியை அருமையாக வாசித்தார். பாடகரிடமிருந்து inspiration போலும்.

கீர்த்தனம் தீக்ஷதரின்ஸ்ரீ சுப்பிரமணியய நமஸ்தே. பாடகர்விரித்துரைத்ததும் மனதினுள் கேள்விகள். எங்கு சென்றன இந்தசங்கதிகளெல்லாம்? வாசவாதி சகல என்று தொடங்கி மீண்டும் ஒரு அநாயாச நிரவல்பகுதி. கமபாமகா ரிகஸாரிகா என்று பழகிய மெலடியை பிரித்து பிரித்துஉபயோகிப்பதும், பத பத ஸரிக.. வாசவாதி என்று அழகாக முடிப்பதுமாக பிளந்துகட்டினார் ஸ்வரங்களில். தீர்மானம் இல்லாமலே முடித்து தனி விட்டார்.

ஏழுநிமிடத்தில் தனியில் சொல்லமுடியாததை ஒரு போதும் சொல்ல முடியாதுஎன்பது ராமபத்திரனின் கருத்தாம். கச்சிதமாக நிரம்பிய தொப்பி சகிதம்வாசித்தார். பாடகர் மறக்காமல் சரணத்தைப் பாடி முடித்தார்.

அரங்கம் நிறைய அப்ளாஸ். என்னையும் சேர்த்து, இருந்த இருபது பேரிடமிருந்து.

இருந்தால் என்ன. சேஷகோபாலன் சொல்வதுபோல வைரக்கடையில் கூட்டம் எதற்கு?

மாண்டுவிலு்ம் (கார்திகை பாலனை) காப்பியிலும் (கந்தவேல் அவனை)அவர் அண்ணா மணக்கால் வரதராஜன் இயற்றிய இரண்டு பாடல்களை படிவிட்டுஸ்ரீராமசந்திரனுக்கு மத்தியமாவதியில் ஜெய மங்களம் பாடி முடித்தார்மணக்கால் ஸ்ரீ ரெங்கராஜன். மூன்று மணிநேரம் சென்றது தெரியவில்லை.

நடுவில் அவரை பாராட்டி கர்நாடிகா சார்ப்பில் ஒரு CD வெளியிட்டார்கள்.அதற்கான நன்றி ஏற்புரையை ரெங்கராஜனின் மகன் ஆனந்தபைரவியில் extempore பாட்டாக பாடி அசத்தினார். ரெங்கராஜன் அவர்கள் வீட்டில் பேச்சே கிடையாதுபோலும்.

பாராட்டிய ஸ்ரீ சுந்தரம் வார்த்தைகளில், மணக்கால் ரெங்கராஜனின் இசையைரசித்து பேஷ்என்று சொல்ல எனக்கு அருகதை கிடையாது. என்னால் முடிந்ததுஆஹா”.

கச்சேரி தொய்வை அளவை: 30

(மெயின் காம்போதியாக இருந்தாலும் அதை அமர்க்களமாகபாடியமையாலும், ஏனைய உருப்படிகளிலும் சாபு மற்றும் ரூபகத்தில் சற்றே மறந்துவிட்ட கீர்த்தனை பொக்கிஷங்களை பாடியமையாலும் தொய்வை குறைவாக கூறப்பட்டுள்ளது. என் மேல் பாய்வதற்கு முன் தொய்வை அளவை கட்டுரையைமுதலில் படித்துவிடுங்கள்)

———–
SAMARPANA Series organized by Carnatica at Tattvaloka auditorium, Eldams Road
Dec 1, 2006. 6:30 PM – 9:30 PM
Vocal – Manakkal Rengarajan
(support vocal – Padmavathi Rengarajan)
Violin – M. C. Chandrasekaran
Mridangam – Vellore Ramabadran
Kutchery Dullness Index: 30