மூதாதையர் குரல்

Video

ஹலபீடுவில் இருந்து பெலவாடி செல்லும் சாலையில் வழி தெரியாமல் எங்கள் வாகனம் திணறிய அவகாசத்தினுள் திடமான கைத்தடி ஒலியுடன் இவள் தோன்றினாள். நின்று நிமிர்ந்து நகைத்து நாலு சொற்கள் நவின்று நிமிராது நடந்து சென்றாள். பார்வையில் நிலைபெற்றதை நோக்கி.

எங்களுக்கும் பெலவாடி கோயில் காலங்கடந்து காட்சிபட்டது.

இயற்கையோவியம்

Image

IMG_1767

கடந்த சில நாட்களாக மேற்குத்தொடர்ச்சி மலைகளுக்கு இப்புறமும் அப்புறமுமாக இனிமையான பயணம். அவகாசமேற்படுத்தி ஓரிரு அனுபவக்குறிப்புகளையாவது எழுதிவைக்க வேண்டும்தான்… மாதிரிக்கு ஓர் இயற்கையோவியம் (ஹாஸனில் இருந்து தர்மஸ்தலா செல்லும் வழியில்).

தற்படம் எடுப்பதைத் தவிர்ப்பதால், (வரவிற்கும் அனைத்துப் படங்களுக்கும்) என் அமெச்சூர் கேமிரா காண்பவற்றினூடே தனித்திருக்கும் ‘மாடல்’ எனும் பெரும் பொறுப்பைப் பயணத்தொடக்கத்திலேயே தன் தலையில் ஏற்றுக்கொண்டுக் கடமையாய்க் கடைசிவரைச் செயல்படுத்தியவர் கவிஞர் மகுடேஸ்வரன்அவர் இப்படத்துடன் வெளியிட்டுள்ள பதிவு.

அகத்திகம்

Aside

என்னை நம்புகிறாயா என்று மனைவி கேட்கிறாள். தக்க பதில் அளிக்கிறேன். அதையே தாய் கேட்கிறாள், தக்க பதில் அளிக்கிறேன். மனைவியை நம்புகிறாயா என்று தாய் வினவினால், அது உனக்கெதற்கு என்கிறேன்.

என்னை நம்புகிறாயா என்று மனிதன் கேட்கிறான். தக்க பதில் அளிக்கிறேன். அதையே இறைவன் கேட்கையில் தக்க பதில் அளித்துக்கொள்கிறேன். இறைவனை நம்புகிறாயா என்று மனிதன் வினவுகையில் அது உனக்கெதற்கு என்றே கூறுவேன்.

அச்சுவை பெறினும்… வாசகி கடிதம்

வழமையானது

arunn-novel-2-tதமிழ் எங்கள் பிறவிக்குத் தாய்
இன்பத் தமிழ் எங்கள் வளமிக்க உளமுற்றத் தீ

என்று எங்கோ தமிழ்ப் பால் ஊட்டி வளர்த்திட்டதால், தமிழ்  தாய்மொழியாய் ஆனதில் பெருமையும் பெருமிதமும் கொண்ட “ழ”கரத்தை “ல” என்றும் “ள” என்றும் யாரேனும் கொல்லும் போது நியாயச் சீற்றம் அடையும் சாதாரணத் தமிழச்சி நான். விமர்சனம் செய்யும் தகுதி இல்லையென அறிந்து (அச்சுவை பெறினும்… நாவலைப் பற்றிய) சில கருத்துகளையும் எண்ணங்களையும் மட்டுமே பகிர்கிறேன் இங்கே.

நன்றியும் வாழ்த்துகளும்:

தமிழிலே எண்ணங்கள் தோன்றுவது அரிது. அவற்றைத் தமிழிலே எழுத்து வடிவமாக்கிப் படிப்பவர்களின் நெஞ்சைத் தமிழிலே தமிழால் தொடும்படியாகச் சிறப்பிப்பது அதனினும் அரிது. இதை அழகாகத் தருவித்த ஆசிரியர் அருணுக்கு இது கடவுள் (அருண் வகையில் திருவரங்கன் :)) தந்த வரப்பிரசாதம். தமிழில் ஒரு நல்ல எழுத்தினைப் படைத்திட்ட அருணுக்கு என்னுடைய மனமார்ந்த நன்றியும் வாழ்த்துகளும்.

பிடித்தவை:

நடைமுறையில் மிகுதியாக இருந்தாலும் சமுதாயக் கோட்பாட்டிற்கு எதிராக இருப்பதால் வெளிப்படையாகப் பேச அஞ்சி இருட்டிலேயே வசிக்கும் இல்புறக் காதலெனும் சர்ச்சையானத் தலைப்பைக் கதையின் கருவாக எடுத்துக்கொண்ட தைரியம்.

நடுவயது நெருக்கடியினால் (midlife crisis) ஏற்படும் மனக்குழப்பங்கள், விரக்திகள், பரிச்சயத்தால் ஏற்படும் அலுப்பு மற்றும் அவமதிப்பினை அழகாகக் கையாண்டது.

நம் தேவைகளுக்கும் ஆசைகளுக்கும் ஏற்ப நம் மனம் எவ்வளவு சாதுர்யமாகக் காரணங்களையும் காரியங்களையும் பின்னுகின்றது என்பதை அழகாக வெளிக்கொணர்ந்தது.

திருச்சி, ஶ்ரீரங்கம் ஊர்களை வருணணை மூலம் கண்முன்னே நிறுத்திய அழகு.

காதலில்லாத திருமணமும், திருமணத்தில் முடியாத காதலும், இரண்டுமே வீண். திருமண உடன்படிக்கைக்குள் காதல் அடங்கும். திருமண உடன்படிக்கை என்றும் காதல் உடன்படிக்கை என்றும் ஒருவனால் இரண்டு குதிரைகளை ஓட்ட இயலாது. இதை நியாயப்படுத்துவதற்கான ரங்காவின் சுவை மிக்க வாதங்களும் தர்க்கங்களும்.

பிடித்ததில் மிகவும் பிடித்தவை:

சின்னதாய் வந்தாலும் தன் வசதிக்கேற்ப நேர்மை விளம்பலை (convenience-based honesty) மிக யதார்த்தமாகவும், தெள்ளத் தெளிவாகவும் கோடிட்டுக் காட்டிய ரங்காவின் அண்ணியின் வாதம்.

ரங்காவின் எண்ணங்கள், உணர்ச்சிகள், வாதம் (ஆண் வாதம்) ஒரு ஆணாக ஆசிரியருக்குப் பரிச்சயமானவை. ஆனால் ரேஷ்மாவின் எண்ணங்கள், உணர்ச்சிகள், வாதம் (பெண் வாதம்) – அவற்றை மிகவும் நுணுக்கமாகவும், நிதர்சனமாகவும் வெளிப்படுத்தியது ஆசிரியரின் வெற்றி.

சில கேள்விகள்/நெருடல்கள்:

ரங்கா மணமுடித்தது ஒரு “வேதவல்லி”யாகத்தான் இருந்திருக்க வேண்டுமா?  ஏன் அவள் ஒரு ப்ரியாவாகவோ, ஒரு டயானாவாகவோ இருந்திருக்கலாமோ? ரங்காவிடம் ஒரு தன்னுணர்வற்ற பிறழ்ச்சி (unconscious bias) இருந்ததா? ரங்கா ரேஷ்மாவை விடுவதற்கு இது ஒரு காரணமாக இருந்திருக்கக் கூடுமோ?

காதல் காதல் காதல், காதல் இல்லையேல் சாதல் சாதல் சாதல் என்ற உண்மையானக் காதலாக இருப்பின் அது எல்லா எதிர்ப்புகளையும் தகர்த்தெறிந்து வெல்லும் சக்தி கொண்டது. ரங்காவால் பதினைந்து வருடங்கள் ரேஷ்மாவின் நினைவே இல்லாமல் எவ்வாறு காலம் தள்ள இயன்றது? அக்காதலை மறுபடியும் உயிர்ப்பித்தெடுக்க ஒரு நண்பியின் மரணம் தேவைப்பட்டதோ?

இவை எனக்குப்பட்ட நியாயமான கேள்விகள் என்றாலும் ரங்காவிற்கும் ரேஷ்மாவிற்கும் தத்தம் நியாயமே அவர்களின் உண்மை – அவர்களின் உண்மையே அவர்களின் நியாயம் என்பதையும் உணர்வேன்.

இல்புறக் காதல் பற்றி ரங்காவின் வாதங்கள், ரேஷ்மா பக்க நியாயங்கள், டால்ஸ்தாயின் ‘ஆணா காரனின்’ மூலம் அவருடைய கருத்துகள் என்பவற்றை விரிவாக விவரித்திருக்கிறார் ஆசிரியர். இல்புறக் காதலைப் பற்றிய அவரின் சொந்தக் கருத்தை அறிய அவா.

அருண் மேன்மேலும் படிப்போரைச் சிந்திக்க வைக்கும், அதே சமயத்தில் இனிமைத் தமிழின் சுவையுண்டு மகிழவைக்கும் நாவல்களை எழுதித் தன்வகையில் தமிழ்த்தொண்டாற்ற எனது மனமார்ந்த வாழ்த்துகள்.

இப்படிக்கு
சங்கீதா.

அறிவியலை உளறல் செய்தியாக்குவது எப்படி?

வழமையானது

சாதாரண அறிவியல் கூற்றை உளரல் செய்தியாக்குவது எப்படி? இன்றைக்கான உதாரணம் ஒன்றை மட்டும் வழங்குகிறேன்.

இயற்பியலாளர்கள் பின்வரும் தலைப்பு, சுருக்கம், உள்ளடக்கம் கொண்ட ஒரு கட்டுரையை எழுதுகிறார்கள்.
தொடர்ந்து படிக்கவும்.

மதிநலக் கணம்

Status

‘மணி என்ன?’ என்பவளிடம் ‘அதைத் தெரிந்துகொள்ளும் வசதி இதன் ஓரத்தில் இல்லை’ என்கிறேன், வாசித்துக்கொண்டிருக்கும் புத்தகத்திலிருந்து தலைதூக்கி. கையில் மதிபேசியற்ற மற்றொரு மதிநலக் கணத்தில்.

தமிழ் இலக்கிய மரபின் அச்சுவார்ப்புகள்

வழமையானது

பின்வருவனவற்றில் ‘|’ குறிக்கு இடப்புறம் அனைத்தும் ஒரு கட்சி, வலப்புறம் எதிர்க் கட்சி. கட்சிகள் எவை என்பதை இறுதி வரியில் விளக்கியுள்ளேன்.

தமிழ் எழுத்தாளனின் புனைவுலகில் தொடங்குவோம்.

ஏழை | பணக்காரன்
(இதன் வகையறா
வீட்டுவாசி | அடுக்ககவாசி
நடப்பவன் | காரில் செல்பவன்
பணியாள் | பணி கொடுத்தவன்
பாட்டாளி | பன்னாட்டு நிறுவன அதிகாரி
வேலையில்லாதவன் | மேலதிகாரி
பீச்சில் சுண்டல் விற்பவன் | அதை வாங்குபவன்
இன்ன பிற…)
தொடர்ந்து படிக்கவும்.

மற்றொரு இந்து கிழமையில்

Aside

காலை எழுந்ததும் பேஸ்ட் ப்ரஷ் வைத்துப் பல் தேய்த்து வாஷ்பேஸினில் உமிழ்வது, பைஜாமாவில் நின்றவாக்கில் கம்மோடில் உச்சா அடிப்பது, பிறகு மின் அல்லது எரிவாயு அடுப்பில் பாக்கெட் பால், கடையில் வாங்கிய காபிப்பொடி, சக்கரை கொண்டு தயாரித்து எச்சை பட எவர்சில்வர் லோட்டாவில் குளிக்காமல் சூடாய் காபி குடிப்பது போன்ற என்னுடைய செயல்களின் அடிப்படைக் குற்றமின்மையை உலகெங்கிலும் வியாபித்துள்ள சக இந்துத்தானர்களிடம் அன்றைக்கு மட்டுமேனும் நிலைநாட்டுவதற்கான தத்துவ தரிசன தர்க்கங்களைக் குறைந்தது ஐயாயிரம் வருடங்கள் பின்னாலிருந்துத் தொடங்க வேண்டியுள்ளது.

செய்தால், மிச்ச நாள் ஓடிவிடுகிறது.

இதற்குப் பயந்தே இன்றைய பொழுதில் விழித்தெழத் துடிக்கும் என்னைப் பகலிலும் பழகிய கனவுலகிலேயே விட்டு வைத்திருக்கிறேன்.

டுவிட்டர் அறிவியல்

Aside

டுவிட்டரில் அறிவியல் எழுத முடியுமா — விவாதிக்க முடியுமா அல்ல, எழுத முடியுமா — என்று 2009-2010இல் ஆங்கிலத்தில் முயன்று பார்த்துள்ளேன். தமிழிலும் முடியும்.

இவ்வாறு

 

இதைப்போல இயற்பியல் (வளர்ந்த) கதை — story of physics — முழுவதையும் தொடர் டுவிட்டர் வாக்கியங்களாய்த் தமிழில் எழுதிவைத்துள்ளேன்.

நேனோ: ஓர் அறிமுகம் – கட்டுரை 6 – நேனோ தொழில்நுட்பம்: தொட்டால் தொடுதிரைப் பூ மலரும்

வழமையானது

கணினி சி.ஆர்.டி. திரையில் தொடங்கி, கடைகளின் பில் போடும் மெஷின், சூதாட்ட ஸ்லாட் மெஷின்கள், பாம் பைலட், ஸ்மார்ட் ஃபோன், அட்டை கணினி என அநேகமாக அனைத்து மின்திரைகளுமே இன்று விரல்களால் தொடுதிரைகளாகிவிட்டது. ஐபாட், ஐஃபோன், ஐ.நா., ஐயா என்று அனைவருமே சற்று அழுத்தினால்தான் விழிக்கிறார்கள்.

நான்கு வெவ்வேறு தொழில்நுட்பங்களைக் கொண்ட தொடுதிரைகள் – (touch screens) சந்தையில் உலவுகின்றன. பிரபலமானவை இரண்டு: ரெஸிஸ்டிவ் டச், கப்பாஸிட்டிவ் டச். இன்ஃப்ராரெட் (infrared), அக்கௌஸ்டிக் (acoustic) என மேலும் இரண்டு வகைத் தொடுதிரைகள் உள்ளன. நேனோ-வுடன் நேரடியாகச் சம்பந்தம் இல்லையென்பதால் இவற்றை இங்கு விளக்கவில்லை.
தொடர்ந்து படிக்கவும்.

தற்படங்கள்

Status

உணர்வுகளுடன் ஒன்றறக் கலந்த நினைவுகளாகும் கணங்களைக் காட்சியாக மட்டுமே வடிகட்டிச் சேர்ப்பது வாழ்வின் சோகம்.

சில மறக்கமுடியாத கணங்களாவது மனச்சித்திரமாய் வாழ்ந்திருக்கட்டுமே. தற்படக் கேமிரா தன்னுறையினுள்ளேயே தங்கட்டும்.

களி(மண்)காலர்கள்

வழமையானது

பெரும்பாலும் அக்கப்போர்தான். அவசியம் வாசிக்கலாம்.

*

இருபது வருடங்களுக்கு மேலாக எழுதிய பின்னர் இன்று பிரபலம் என்று அவரைச் சந்திப்போரால் அறியப்படும் ஒரு எழுத்தாளருக்குப் பக்கவாட்டில் தொன்னூறு டிகிரி கோணத்தில் நடந்து முடிந்த புத்தகக் காட்சியில் ஒரு கடையில் அமர்ந்திருக்க நேர்ந்தது.

அவருக்கு அந்தப் பக்கம் இருக்கையில் முகநூல் பிரபலம் என்று கருதப்படுபடும் ஒருவர் வந்து அமர்ந்தார். இவரது சீரான எழுத்தும் புத்தகங்களாய் வந்துள்ளது. இருபதாயிரத்திற்கும் அதிகமான லைக்குகள் சம்பாதித்திருப்பதைப் பற்றியும் தொடர்பான சில பல பேச்சுக்களாகவும் இருந்தவர், கடையில் வருவோரில் தெரிந்தோர்களிடம் அதுவரைச் சிலாகித்திருந்த தன் ஜெர்மன் அலைபேசியில் கைப்பழக்கத்தில் ஒரிரண்டு தற்படம் (ஸெல்ஃபீ) எடுத்துக்கொண்டார். முகநூலில் இடுவதற்காக. பிறகு அருகிலிருந்தவரிடம் அலைபேசியைக் கொடுத்து, பக்கம் அமர்ந்திருந்த பிரபல எழுத்தாளருடன் தன்னைப் படம் பிடிக்கச் சொன்னார். முகநூலில் இடுவதற்காக. நானும் தொன்னூறு டிகிரியில் அமர்ந்திருந்து அதுவரை அவர்களுடன் கலகலத்திருந்ததால் — சென்ற வருடமே நானும் சில தமிழ்ப் புத்தகங்கள் எழுதியுள்ளேன் என்று அவர்களுக்கு அறிமுகமாயிருந்தேன்; இம்முறையும் என் இரண்டாவது நாவல் ஏற்கெனவே அவர்களிடம் சுட்டப்பட்டிருந்தது — இணக்கமாய்ப் பெயர் சொல்லி என்னையும் சேர்த்துப் படம் பிடிக்கச் சொன்னார். சந்தேகத்திற்கு இரண்டாக எடுத்துக் கொண்டார்.

நான் முகநூலில் இல்லை என்பதைக் கேட்டுத் தெரிந்துகொண்டார்.

நாளை முகநூலில் படங்களைப் ‘போட்டுவிடுவேன்’ என்றார்.

நாளை அவருடைய முகநூலைப் பார்த்தேன் (நீதான் அதில் இல்லையே எப்படி என்று கேட்காதீர்கள்; இருபது வருடங்களாய் இணைய இருட்டில் தட்டுத் தடுமாறி உலவுபவனுக்கு முகவரி இல்லாமல் முகநூலில் புழங்குவது அங்கு பிரபலமாவதை விட எளிதே). முகநூல் பிரபலம் சொன்னபடியே படத்தைப் போட்டிருந்தார். படத்தில் அவருடன் பிரபல எழுத்தாளர் மட்டும் இருந்தார்.

மேட்டர் முடியவில்லை.
தொடர்ந்து படிக்கவும்.

நேனோ: ஓர் அறிமுகம் – கட்டுரை 5 – நேனோ பொருள்கள்: கிரஃபீன் தகடு, கரி-குழாய், கரி-உருண்டை

வழமையானது

கிரஃபீன் (Graphene) என்பது ஒரு அணு பருமனால் ஆகிய உயரத்துடன், கார்பன் அணுக்கள் பக்கவாட்டில் கைகோர்த்து அமைக்கும் நேனோ-அளவு அணிவரிசை. பரப்பு சில சென்டிமீட்டர்வரை கூடச் செல்லலாமாம்.

இப்பொருளை 2004இல் கண்டுபிடித்ததற்காக 2010 இயற்பியல் நோபல் இங்கிலாந்தின் மான்செஸ்டர் பல்கலைக்கழகத்தைச் சேர்ந்த ஆண்ட்ரீ கெய்ம் (Andre Geim) கொன்ஸ்டெண்ட்டின் நொவோஸெலெவ் (Konstantin Novoselov) இருவருக்கும் அளிக்கப்பட்டுள்ளது. இரு பரிமாண கிரஃபீன் பற்றிய “நிலமதிரும் பரிசோதனைகள்” நிகழ்த்தியதற்காக இப்பரிசு என்கிறது நோபல் பரிந்துரை.

இளசுகளுக்கு மார்ஃபீன் போல, இயற்பியலாளர்களுக்கு கிரஃபீன் தற்போதைய டார்லிங் மேட்டர். சுண்டிய பருப்பொருள் இயற்பியல் (condensed matter physics) துறையின் ஆராய்ச்சியை 2004இல் சூறாவளியாய்த் தாக்கியது கிரஃபீன் கண்டுபிடிப்பு. கடந்த சில வருடங்களாக உலகில் முக்கியமான ஆராய்ச்சி மையங்களில் கிரஃபீனின் தன்மைகள், உபயோகங்கள் தீவிர ஆராய்ச்சியில் இருக்கிறது.

தொடர்ந்து படிக்கவும்.

நேனோ: ஓர் அறிமுகம் – கட்டுரை 4 – நேனோ பொருள்: நேனோ திரவம் தேடி

வழமையானது

நேனோ திரவம் அல்லது நேனோ பாய்மம் (nanofluids) என்பது சமீப சில வருடங்களாய் ஆய்வுச்சாலைகளில் புழங்கும் பொருள்.

ஏற்கெனவே அறிமுகம் செய்துகொண்டபடி, நேனோ மீட்டர் என்பது ஒரு மீட்டரில் ஒன்றின் கீழ் நூறு கோடி பாகம். ஒரு அணுவின் அளவைவிட பத்துமடங்கே அதிகம். அப்படியென்றால் நேனோ-திரவம் என்பது நிச்சயமாக இருக்கிறதா இல்லையா என்று கண்ணுக்கே தெரியாத நேனோ-அளவில் உள்ள திரவமா?

இருக்காது என்று அனுமானிக்கலாம். அப்படியென்றால் நேனோ திரவம் நேனோ-அளவு துகள்களால் ஆனது என்று கூறலாமா? அதுவும் முடியாது. ஏனெனில், காற்று, காப்பி, டீ என அனைத்துத் திரவங்களும் நேனோ-அளவு அணுக்கூட்டணிகளினால் ஆனவைதானே.

தாமிரம், அலுமினியம் போன்ற உலோகங்களின் நேனோ-அளவிலான துகள்களை தண்ணீரைப் போன்ற ஒரு சாதாரண திரவத்தில் தூவி ஒரு கலக்கு கலக்கி கூழ்மமாக்கினால் (colloid) அது நேனோ திரவம் அல்லது பாய்மம்.

தொடர்ந்து படிக்கவும்.

அச்சுவை பெறினும்… நாவல்

வழமையானது

arunn-achuvai-perinum-frontஅச்சுவை பெறினும்… என் இரண்டாவது நாவல். தமிழினி வெளியீடு.

ஜூன் 1 முதல் நடக்கவிருக்கும் சென்னை புத்தகக் காட்சியில் தமிழினி நிலையத்தில் கிடைக்கும்.

பிறகும், வழக்கம்போல, வாசிக்க மனமிருப்போருக்கு உலகின் மூலை முடுக்கிலெல்லாமும் கிடைக்கும். புத்தக வடிவில் வாசிப்பதற்கு ஓர் விலையை அளிக்கவேண்டியிருப்பதைத் தவிர்க்க இயலாது.

[தொடர்பு: தொ.பேசி எண் 9344290920]

*

தத்தமது சதிபதிகளுடன் அமெரிக்கா பெங்களூர் என்று இல்லறம் பேணும் இருவர் மீண்டும் காதலர்களாய்த் தாங்கள் வளர்ந்த சிற்றூரில் இரு தினங்கள் சந்தித்துக்கொள்ள நேர்ந்தால்? இல்புறக் காதலின் அச்சுவையைப் பெறுவதற்கான விலையை இல்லற அன்பும் அறனும் பொறுக்க வல்லதா?

இதுதான் புத்தகப் பின் அட்டைக்கு எழுதிக் கொடுத்துள்ள சாரம்.
தொடர்ந்து படிக்கவும்.

நேனோ: ஓர் அறிமுகம் – கட்டுரை 3 – நேனோ-விளைவு – அறிவியலும் மிகையும்

வழமையானது

நேனோ ஓர் அறிமுகம் கட்டுரை வரிசையில் சென்ற வாரம் வெளியான தங்கத்தின் நிறம் நீலம் கட்டுரையை வாசித்துக்கொள்ளுங்கள்.

இப்போது, “நேனோ வரலாறு” கட்டுரையின் பிற்பகுதியில் ஏற்கெனவே குறிப்பிட்ட ரோமானியர்கள் நான்காம் நூற்றாண்டில் வடிவமைத்த லைஸர்கஸ் கோப்பையை (Lycurgus Cup) எண்ணிப்பாருங்கள். அதில் நிகழ்ந்தது மேலே விளக்கியுள்ள தங்க நிறமாற்ற விளைவுதான். வெளியிலிருந்து பார்க்கையில் ஒரு நிறத்திலும், உள்ளே விளக்கேற்றி ஒளிரூட்டினால் வேறு நிறத்திலும் தெரிந்தது பரப்பினில் இருந்த நேனோ தங்கத்தினால்.

செயல்வடிவமாய் கோப்பையை ரோமானியர்களால் அன்றே வடிவமைக்க முடிந்துள்ளது. ஆனால், நேனோ-அறிவியல் விளைவுகளை அறிந்து செய்திருக்கவில்லை. உதாரணமாக, சார்பியல் கோட்பாடு 1905இல் ஐன்ஸ்டைனால் முதன்முறையாக முன்வைக்கப்பட்டது. குவாண்டம் இயற்பியல் அதன்பிறகுதான், 1981இல் அதிநுண்ணோக்கி கண்டுபிடிக்கப்பட்டபிறகே, நேனோ-அளவுகளில் தங்க அணுக்களின் கூட்டணியை அருகில் பார்ப்பதற்கு முடிந்தது. ஏன் தங்கத்தின் நிறம் நேனோ-அளவுகளில் மாறுகிறது என்பதை விளக்குவதற்கு மேற்படி அறிவியல் புரிதல்கள் இன்றியமையாதவை.

amrutha-2014-02-arunn-thangathin-niram-nilam-fig-2

இதேபோலத்தான் கண்-மையில் நேனோ-கரி-குழாய்கள் தென்படுவதும். கரி-குழாய்கள் நேனோ-மீட்டர்களில் உருவாக்கமுடிந்த மற்றொரு நேனோ-அறிவியல் விந்தைப் பொருள். தனிக் கட்டுரையில் அறிமுகப்படுத்துவோம். ஆனால், இக் கரி-குழாய்கள் கண் மையில் இருப்பதை சமீபத்தில் கண்டறிந்தனர். இதனால், பழங்காலத்தில் மை தயாரிப்பதே நேனோ கரி-குழாய்கள் செய்வதற்குதான் என்றோ, நேனோ கரி-குழாய்களை மை தயாரிப்பவர்கள் அறிந்திருந்தனர் என்றோ ஏற்றுக்கொள்ள இயலாது. மரபான வழியில் தரமான மை செய்வதெப்படி என்பதையே நம் முன்னோர்கள் அறிந்திருந்தனர். அதில் நேனோ அளவுகளில் பொருட்கள் இருந்ததை இன்றுதான் அதிநுண்ணோக்கி வழியே கண்டறிந்துள்ளோம். அறிவியல் அறிதலுடன் இன்று நேனோ கரி-குழாய்களை மை தயாரிப்பு இல்லாமல், தனிச் செயல்முறையில் கட்டமைக்கமுடியும்.

மீண்டும் வலியுறுத்துகிறேன். இன்றைய அறிவியல் புரிதலைக் கடந்த, ‘மேம்பட்ட அறிதல்’ பழங்காலத்தில் நம் முன்னோர்களிடையே இருந்ததற்கான ஆதாரங்கள் இல்லை. கலை, தொழில் தேர்ச்சிகள் இவ்வாறு செய்வதால் அறிவியல்-சரியாக இவ்வாறு நிகழும் என்பதற்கொப்பான ‘செயல்-விளைவு’ (cause and effect) வகையில் தருக்க சிந்தனைகளுடன் விளைந்தவை இல்லை. பலமுறை திருத்திச் செய்துபார்த்து வேண்டியவகையில் அமைவதையே மரபானதொரு தொழில்நுட்பமாய், கலையாய் வளர்த்தெடுத்துள்ளோம்.

இதில் இழுக்கொன்றுமில்லை. உதாரணமாக, கட்டடக்கலையின் அறிவியலை அறிந்திராது வடிக்கப்பட்ட இணையற்ற கோயில்கள் நாம் பெருமைகொள்ளவேண்டிய பாரம்பரிய அபாரங்களே. மிகையுணர்வுடன் அவற்றை அணுகி, இன்றைய அறிதல்களை அவைமீது ஏற்றிச்சொல்வது தகாது.

இணையத்தில் எழுத்தாளர்களில் தொடங்கி பலரும் தங்கள் வலைப்பூக்கள் தரும் பரிசீலனையற்ற சுதந்திரத்தில் இவ்வகையில் உணர்ச்சிக்குவியலாய் எழுதிக்குவிப்பர். இவையெல்லாம் அறிவியல் இல்லை. ஆய்ந்தறியும் நிலையை இழந்த, சந்தை அறிவியலைக் கடந்த மந்தை அறிவியல்.

நேனோ: ஓர் அறிமுகம் – கட்டுரை 3 – நேனோ-விளைவு: தங்கத்தின் நிறம் நீலம்

வழமையானது

நேனோ நோநோ” பகுதியில் குறிப்பிட்டவகையில், பொருட்களில் நேனோ-மீட்டர் அளவுகளில் நிகழும் சில நேனோ அறிவியல் விளைவுகள் உள்ளன.

அணுக்கூட்டணி மோட்டார்கள், அணுக்கூட்டணி சுவிட்சுகள், ஒரே எலக்ட்ரானில் அதன் இருநிலைகளில் சுழற்சியின் மூலம் தகவல் சேமித்தல், மருந்துகளை நேனோ-அளவில் பொடிகளாக்கி நேரடியாக இழையங்களில் (tissue) உயிரணுக்களில் (cells) சேர்த்தல் போன்றவை நேனோ-அறிவியல் தளத்தில் இயங்குபவை.

மரபணு-சில்லுகள் (gene-chips) வாயு அறிவான்கள் (gas sensors), அதிக்குளிரூட்டம் (hyperthermia) போன்றவற்றில் நேனோ-தொழில்நுட்பத் தேர்ச்சி இன்று நமக்கு உள்ளது.

நேனோ வரலாறு பகுதியில் சுட்டப்பட்ட ஒரு நேனோ விளைவை விரிவாக இங்கு அறிமுகம் செய்துகொள்வோம். தங்கத்தின் நிறம் நீலம்.
தொடர்ந்து படிக்கவும்.

ஏன் எழுதுகிறேன்?

வழமையானது

பதாகை இணைய சஞ்சிகையில் வெளியாகியுள்ள என் கட்டுரையின் மீள்-பதிவு.

*

ஏன் எழுதுகிறேன்? வருகிறது, செய்கிறேன். சுவாசம் போல. மறக்கையில் நிற்கும். எழுத்தும்.

எனக்கு நினைவு தெரிஞ்ச நாள்லருந்தே… எனத் தொடங்குகிறது ஆற்றல் பானத்திற்கான ஓர் விளம்பரப் பேச்சு. எனக்கு நினைவு தெரிஞ்ச நாள்லருந்தே… நான் எழுதி வருகிறேன். வீட்டு முற்றத்தின் செம்மண் படிக்கோலத்தின் மீது நெல் கொட்டி, அதில் கிழக்குப் பார்த்துத் தாத்தாவின் மடியில் இருந்தவாறு சூரியன் சாட்சியாக முதல் எழுத்தை ‘அ’ என விரலினால் எழுதினேன். அறியாது எழுத்தறிவிக்கப்பட்ட இதற்குப் பல வருடங்களுக்குப் பின்னரே எழுத்து ஆ என்றானது எனக்கு. இடையில் தலையெழுத்தில் கையெழுத்து மறைந்து மின் திரையெழுத்து மிளிர்ந்துவிட்டது, மலிந்து விட்டது.

பிடித்தவை இரண்டு வகை. நமக்குப் பிடித்தவை. நம்மைப் பிடித்தவை.

குஞ்சாலாடு, கோணேஸ்வரர் ஆலயம், குடமுருட்டி ஆறு, கோட்-சூட் பிழைப்பு இன்னபிற பழகப் பழக நமக்குப் பிடித்தவை என்றாகியிருப்பவை. முகநூல் மொக்கைகள் பலதும் இன்று லைக் பெற்று நமக்குப் பிடித்தவை என்றாகிறது.
தொடர்ந்து படிக்கவும்.

நேனோ: ஓர் அறிமுகம் – கட்டுரை 2 – நேனோ வரலாறு – பகுதி 2 – சமீப நூற்றாண்டுகளில்

வழமையானது

nano-book-fig-11857 – மைக்கெல் ஃபேரடே (Michael Faraday) கூழ்ம நிலையில் ‘ரத்தின’ தங்கம் (‘ruby’ gold) எனப்படும் பொருளைக் கண்டுபிடித்தார்.

நேனோ துகள்களாய் தங்கம் இருக்கையில், அதன் நிறம் மஞ்சளன்று. இளஞ்சிவப்பு. ஏன் என்று வரும் கட்டுரையில் விளக்குவோம். முக்கியமாக, ஃபேரடேவும் தான் நேனோ-பொருள் செய்கிறோம் என்று அறிந்து செய்யவில்லை. பரிசோதனையில் எதிர்பாராமல் நிறம் மாறும் தங்கத்துகள்களைக் கண்டார். ஏன் நிறம் மாறுகிறது என்பதைப் புரிந்துகொள்வதற்கான இயற்பியல், வேதியியல் அறிவு அவர் நூற்றாண்டில் உருவாகவில்லை.
தொடர்ந்து படிக்கவும்.

நேனோ: ஓர் அறிமுகம் – கட்டுரை 2 – நேனோ வரலாறு: வைசேஷிக அணுவிலிருந்து – பகுதி 1

வழமையானது

ஹாலிவுட் இயக்குநர் ஸ்பீல்பெர்க் தயாரித்த சை-ஃபி திரைப்படம் ‘ஹனி, ஐ ஷ்ரங் தி கிட்ஸ்’ நீங்கள் பார்த்திருக்கலாம். விஞ்ஞானித் தகப்பன் தன் வீட்டுக் கொட்டகையில் கட்டமைத்த கருவியினால் தற்செயலாகத் தன் குழந்தைகளைச் சுண்டைக்காய் அளவிற்குச் சுருக்கிவிடுவார். சிறு உருவில் அவர்கள் எதிர்கொள்ளும் தினவாழ்வின் சவால்கள் வெள்ளித்திரையில்.

இவ்வாறு நிஜமாகவே நம்மைச் சுருக்கமுடியுமா? என்றால், திரைப்படத்தில் விஞ்ஞானி கூறும் தர்க்கம் பின்வரும் வகையில் அமையும். மாலிக்கியுல் என்னும் ஒவ்வொரு அணுக்கூட்டணியிலும் அணுக்களிடையே நேனோ-மீட்டர் அளவுகளில் நிறைய இடைவெளியுள்ளது. அதைப்போலவே, ஒவ்வொரு அணுவிலுமே மத்தியில் இருக்கும் நியூட்ரான் துகளுக்கும் அதைச் சுற்றியிருக்கும் எலக்ட்ரான், புரோட்டான் துகள்களுக்கும் இடையே ஆங்ஸ்ட்ராம் அளவுகளில் (ஒரு மீட்டரில் பத்தாயிரம் கோடி பாகம்) தூரம் அதிகம்.

திருவிழாவிலோ, வாசலில் கைவண்டிகளிலோ வாங்கிச் சுவைக்கும் பெரிதாக புஸுபுஸுவென இருக்கும் பஞ்சுமிட்டாயை அமுக்கி கைக்குள் அடக்கும் உருண்டையாக்கி விடுகிறோமே. அதுபோல, ஒவ்வொரு அணுக்களின் உள்ளிருக்கும் இடைவெளிகளையும், அணுக்கூட்டணிகளில் இருக்கும் இடைவெளிகளையும் மெகா அழுத்தம் கொடுத்து சுருக்கிவிட்டால், பருப்பொருளும் பல மடங்கு சுருங்கிவிடுமே.

இவ்வித தர்க்கத்தை அறிவியல் சரியாக முதலில் கூறியவர் நோபல் பரிசு பெற்ற அமெரிக்க இயற்பியலாளர் ரிச்சர்ட் ஃபேய்ன்மன் (Richard Feynman). 1959இல் ஆற்றிய உரையில் இவ்வித சுருக்கலின் (miniaturization) இன்றியமையாமையைச் சுட்டிக்காட்டினார். “கீழே நிறைய இடமுள்ளது” எனப் பொருள்படும் தலைப்பில் பிரபலமான இவ்வுரைதான் இன்று நேனோ-டெக்னாலஜியை அறிவியலாளரின் பார்வைக்கு வைத்ததாய் கருதப்படும் ஆவணம்.
தொடர்ந்து படிக்கவும்.